Жазушы-журналист, филология ғылымдарының докторы, Қазақстан Республикасының еңбек сіңірген қайраткері, Парламент Мәжілісінің бірнеше шақырылымының депутаты Уәлихан Қалижановтың есімі газетіміздің оқырмандарына етене таныс.
Қоғам және мемлекет қайраткері Уәлихан Қалижанов журналистиканың қазанында қайнап, үлкен саясатқа келді. Депутат бола жүріп, қолынан қаламын түсірмеді. 15-тен астам көркем кітаптар мен эсселердің авторы.
У.Қалижанов Елбасы, Қазақстан Республикасының тұңғыш Президенті туралы кезінде «Президент» атты кітап та жазған еді. Енді «Құс жолы» баспасынан автордың «Ел мен Ер» атты көркем публицистикалық мақалаларынан тұратын жаңа кітабы жарық көрді. Ел тәуелсіздігінің 20 жылдығына арналған кітапта Н.Ә.Назарбаевтың сан қырлы саяси қызметіне сараптама жасалады. Мысалы, «Замана сыны» атты мақаласында автор әлем мойындаған саяси тұлғалар Ататүрік, Қытай реформасының атасы Дэн Сяопиннің, Сингапур реформасының пірі саналатын Ли Куан Ю, Францияның басшысы болған Шарль де Голль, АҚШ президенті болған Рональд Рейганның саяси қызметтерін салыстыра отырып, автор Н.Ә.Назарбаевтың феномені не деген сұраққа жауап іздейді. «Елбасы феномені» неде дегенде, Назарбаевтың ұлтжандылығында, оның қазақылығында жатыр деп есептейді.
«Н.Ә.Назарбаевтың жылы жүзі, жұртты бірден баурап алатын қасиеті, сөзден өрмек тоқитын шешендігі, кісілігі мен талғампаздығы, психологиялық байқампаздығы, айналып келгенде, елінің, халқының, жалпы түркі әлемінің көк туының айналуына ықпал етті», деп жазады автор. Бұл мақалада қалың жұрт біле бермейтін детальдар көп пайдаланылған. Мәселен, Сингапур реформасының атасы Ли Куан Ю мен Қазақстан басшысы Н.Ә.Назарбаевтың арасындағы әңгімені жазып алған У.Қалижановтың одан Қазақстандағы жүргізілген реформалар туралы ой-толғақтары оқырманды бей-жай қалдырмайды.
Кітаптағы «Бірінші» деп аталатын мақаланы да оқырман қызыға оқитыны сөзсіз. Мұнда 22 жасар домнашы, теміртаулық Н.Ә.Назарбаевтың Бүкілодақтық комсомол съезіне 1964 жылы делегат болып әлемдегі бірінші космонавт Ю.А.Гагаринмен суретке түсіруді ұйымдастыруымен екеуара әңгімедегі «бірінші» болу оңай ма деген сауалда өрбіген тарихи шендестірулер жүрекке ерекше жылы тиеді.
«Қоғамдық ойдың тайқазаны», «Ел мен Ер», «Ислам әлемі» және Н.Ә.Назарбаев», «Астанада Хельсинки рухы асқақтап тұр», «Алтын орда – Астана» және тағы басқа мақалаларда Қазақстанның тұңғыш Президенті, Елбасы Н.Ә.Назарбаевтың әлемдік саясаттағы орнын айғақтайтын саяси танымдық мағлұматқа мол деректермен ерекшеленеді.
У.Қалижанов кітабының мәйегі тарих таңдаған тұлға – Н.Ә.Назарбаев! Бұл қалың оқырман мен саясаткерлер үшін қызықты көркем публицистиканың үлгісі боларлық кітап.