Облыста соңғы үш жылда 86 спорт нысаны іске қосылды
Спортшының туа біткен дарыны, қажырлы еңбегі, уақытпен санаспай жасайтын жаттығаулары арқасында діттеген деңгейден көрінетіні белгілі. Ал, осынау тұтастықты қолдап, қанаттандырып жіберу биік жетістіктерге жетелеумен қатар, бұқаралық спорттың да өрісін кеңітіп, жұртшылықты белсенділікке бастайтыны анық. Бұл тұрғыдағы жанашырлық үлгісін астаналық облыстан көптеп табуға болады.
Облыс туризм, денешынықтыру және спортты дамытуға 2010 жылы 2 миллиард теңге бөлді. Бұл – 2009 жылмен салыстырғанда 18 пайызға артық. Екі-үш жылдың жүзінде Көкшетау қаласында ірі әмбебап спорт сарайы, Сандықтау ауданында шаңғы-роллер трассасы, Бурабай ауданында республикалық шаңғы базасы пайдалануға берілді. Қазір қолда бар екі мыңға жуық спорт нысандарында жарыстар көрігі қызып тұр. Жылға толмайтын уақытта 4 спорт мектебін күрделі жөндеуге 80 миллион теңге жұмсалса, спорт мекемелерінің материалдық-техникалық базасын нығайту мақсатында 29 миллион теңге қаржы игерілді. Өңірдегі спорт ұйымдарында 1500 бірінші разрядты спортшы, 157 спорт шеберлігіне кандидат, 29 спорт шебері, 5 халықаралық дәрежедегі спорт шебері даярланса, Қазақстан тарихындағы айрықша оқиға Қысқы Азия ойындарына қатысқан 5 саңлақ алты алтын, екі күміс, үш қола медальмен қуантты. Бұл спорттың бұқаралық сипатына да ерекше серпін бергенін атап өту лазым. Қазіргі таңда денешынықтыру және спортпен айналысушылар саны 114 мың адамға жетіп, облыс тұрғындарының 16 пайызын құрады. Биыл Көкшетаудың Бұқпа тауындағы шаңғы-роллер жолын, Қопа көлінде желкенді қайық спортын дамыту мақсатында яхт-клуб, ашық және жабық теннис корттарының құрылыстары басталды. Саланы дамытуда бизнес өкілдері әлеуметтік әріптестік қызметін өрістеткеніне ризашылық білдіру қажет. «Егемен Қазақстан» жуырдағы санында «Логос Трайд» ЖШС директоры, ауыл шаруашылығы ғылымдарының докторы Ғалым Құдайбергеновтің Астрахан ауданындағы Жалтыр ауылының тұрғындарына әмбебап стадионды тарту еткенін жазған еді. Ал, Жақсы ауданында қаладағыдан кем емес спорт кешенін ашып, бокстан Қазақстан чемпионын тәрбиелеп шығарған Батырбек Уәлиевтің атымтай жомарттығы ел аузынан түспейді. Жеке кәсіпкер Батекең биыл Бурабайда спорт базасының құрылысын аяқтап, онда ел құрама командасының былғары қолғап шеберлері жаттығулар өткізуде. Биылғы Спорт форумына делегат болып қатысқан кәсіпкер Ербол Тоқаев Көкшетау қаласында «Қайрат» мамандандырылған қазақ күресі спорт залын өз қаражатына салып берді. Елге қызмет етудің үлгі-қырларын танытып отырған Талғат Әлжановтың, Зуфар Серажиевтің, Талғат Темірғалиевтің, Игорь Цойдың еңбектеріне де гүл бітсін дегіміз келеді. Сөз соңында, тамызда, Қазақстан Тәуелсіздігінің 20 жылдық мерейтойы құрметіне 64 жастағы Анатолий Поляков пен Темір Хамзин Көкшетау қаласындағы 6 шақырымдық Бұқпа көлін алғаш рет жүзіп өткенін мүбәрак хабар ретінде жеткізгіміз келеді.Бақберген АМАЛБЕК.
Ақмола облысы.
