«Qazaqstan» РТРК Басқарма төрағасы Ерлан Қарин айтқандай, «ұлттық» деген анықтама атауының өзі телеарнаның бар болмысын айғақтайды. Ұлттық корпорация өзінің мерейлі 60 жасына аяқ басып отыр. Телеарнаның 60 жылдығына арналған «Qazaqstan» – еліміздің телеэпопеясы: ұлттық арнаның даму моделі» атты халықаралық ғылыми-тәжірибелік конференция мен салтанатты шаралар жиынтығы кеше әл-Фараби атындағы ҚазҰУ-де кеңінен аталып өтті.
Кең ауқымды бағдарламаға сәйкес, шаралар легі осы уақытқа дейін қалыптасқан дәстүрмен сабақтаса келіп, журналистика факультетінің жанынан ұлттық арнаның «Qazaqstan» оқу-шығармашылық зертханасының ашылуымен басталды. Бұған дейін факультетте «Егемен Қазақстан» газеті мен «Хабар» телеарнасы өз зертханаларын ашқан болатын. Зертхананың ашылу салтанатында ҚазҰУ ректоры, академик Ғалымқайыр Мұтанов пен «Qazaqstan» РТРК Басқарма төрағасының бірінші орынбасары Ләззат Жүнісова лента қиып, телевизия саласының майталман ардагерлері Құсман Игісінов пен Ласкер Сейітов ақсақалдық ақ батасын берді. Болашақта бұл зертхана заманауи талаптарға жауап бере алатын, ақпарат пен цифрлы технология тілін меңгерген мамандар даярлаудың бірегей ұстаханасына айналатыны сөзсіз. Сондай-ақ Л.Жүнісова журналистика факультетіндегі телевизия ісіне маманданып жүрген студенттер үшін жарияланған ең үздік студенттік материалдардың бес жеңімпазына шәкіртақы табыс етті. Бұдан соң конференция қонақтары мен қатысушылары «Қазақстандағы тележурналистиканың дамуы мен қалыптасуы» атты «Qazaqstan» телеарнасының 60 жылдығына арналған баспасөз материалдары, кітап және фотокөрмені тамашалады.
Конференция қатысушыларына ұлттық арнаның тарихын баяндайтын бейнежазба – деректі фильм көрсетілді. Бүгінде телеарнада музыка мен эстраданы насихаттайтын «Мен – қазақпын», «Hit-Qazaqstan», «Сазгер», еліміздің көрікті жерлерімен таныстыратын «Ел ішінде», «24 сағат табиғат құшағында», «Киелі Қазақстан», «Ұлы дала ұлағаты», сондай-ақ «Алаштың аманаты», «Тарихтың тамырында» көрерменге жол тартты. Көпшіліктің көңілінен шыққан ақпараттық-саяси «Апта», «Ақпарат», «1 студия», «Менің Қазақстаным», «Қарекет», «Келбет», «Жарқын бейне» сынды деректі, танымдық, әлеуметтік, рухани бағыттағы бағдарламалар жалғасын тауып жатыр.
Конференция жұмысы «Qazaqstan» арнасының аға буын өкілдері Құсман Игісінов, Фатима Бегенбаева, Гүлмария Барманбекова, Марс Омаровтың және бүгінгі көрерменнің ықыласына бөленіп жүрген Бейсен Құранбек, Нартай Аралбайұлы, Мейіржан Әлібек, Баян Бақкелді, Алмат Әбдіраман, Ерлан Атамбай сияқты жас буынның журналистика факультетінің студенттеріне арналған шеберлік сабақтарымен ұштасты.
Айгүл АХАНБАЙҚЫЗЫ,
«Егемен Қазақстан»
АЛМАТЫ
