Сенат комитетінің төрағасы Асқар Бейсенбаев Президент Н.Ә.Назарбаевтың Қазақстан халқына Жолдауында мемлекеттік-жекешелік әріптестік аясында мемлекеттік мүлікті сенімді басқару, қызмет көрсету шарттары және басқа да сипаттары бойынша мемлекеттік мүлікті басқарудың түрлерін пайдалана отырып жеке капиталды экономикаға тарту жөнінде міндет қойылғанын атап өтті. Бұл ретте келісудің барлық түрлерін, әсіресе, шағын жобаларға қатысты рәсімдерді мейлінше оңайлату және жеделдету көзделіп отыр. Мемлекеттік-жекешелік әріптестік инфрақұрылымды, оның ішінде әлеуметтік саланы дамытудың басты тетігі болуы тиіс. Ол, сондай-ақ заманның өзгеруіне байланысты бізге мемлекеттік-жекешелік саласындағы әрбір инвестор үшін күресуіміз керек екенін атап өтті.
Парламент Сенаты Төрағасының орынбасары С.Громов Қазақстанда мемлекеттік-жекешелік әріптестікті дамыту үшін қажетті құқықтық, институттық және инфрақұрылымдық негіз жасалғанын жеткізді. 1991 жылы «Қазақстан Республикасындағы концессиялар туралы» заң қабылданып, мемлекеттік-жекешелік әріптестіктің заңды негізі жасалды және 2015 жылы қабылданған «Мемлекеттік-жекешелік әріптестік туралы» заңмен жетілдірілді.
Сенатор Сәрсенбай Еңсегенов мемлекеттік-жекешелік әріптестікті дамытудағы меншікті қаржының жеткіліксіздігі, қол жетімді қордың болмауы, банк қарыздарының пайыздық мөлшерлемесінің жоғарылығы, қаржы институттары белсенділігінің төмендігі секілді бірқатар өзекті мәселелерді атап өтті.
Ұлттық экономика министрінің бірінші орынбасары Руслан Дәленов дөңгелек үстелге қатысушыларды еліміздегі мемлекеттік-жекешелік әріптестікті дамытудың негізгі көрсеткіштерімен таныстырды. Бүгінгі таңда мемлекеттік-жекешелік әріптестік саласында 200 нысан бойынша жалпы сомасы 401,6 млрд теңге болатын инвестицияға 194 шарт (298,4 млрд теңгеге республикалық 6, 103,2 млрд теңгеге жергілікті деңгейдегі 188) жасалғанын атап өтті.
Инвестициялар және даму министрінің орынбасары Арыстан Қабыкеновтің айтуынша, мемлекеттік-жекешелік әріптестік жөніндегі бірқатар ірі жобалар жүзеге асуда. Олардың ішінде құны 512 млрд теңге болатын «Үлкен Алматы айналма автомобиль жолының» құрылысы мен пайдалануға беру, «Алматы-Қорғас» автомобиль жолының бөлігінде құны 98 млрд теңгеге бағдарланған «Нұр жолы» көлік өткізу бекетіне инфрақұрылым жасау да бар.
Денсаулық сақтау министрінің орынбасары Лязат Ақтаева мемлекеттік-жекеменшік әріптестік жобаларының тізіміне қазіргі кезде 138, оның ішінде 3 республикалық және 135 жергілікті маңызы бар жоба енгенін хабарлады.
Дөңгелек үстел отырысы барысында Парламент Сенатының депутаттары мемлекеттік-жекешелік әріптестікті тиімді дамытуға кедергі болатын мәселелерді шешу жолдарын талқылады. Құқықтық, нормативтік-құқықтық негіздерді жетілдіру, қаржыландырудың қосымша көздерін тарту, несиемен қолдауды қамтамасыз ету, валюталық қауіптерге өтемақы төлеу бюджеттен тыс қорлардың рөлін күшейту, мемлекеттік кепілдеме беру тетіктерін қолдану қажеттігі және басқа мәселелер аталып өтілді.
Дөңгелек үстелдің қорытындысы бойынша ұсынымдар әзірленіп, ел Үкіметіне, жергілікті атқарушы органдар мен басқа да мүдделі органдарға жіберілетін болды және ол бұдан былайғы заң шығару жұмыстары барысында депутаттардың назарында ұстау көзделіп отыр.
