Оңтүстік Қазақстан облысы, Созақ ауданының 90 жылдығына және Астананың 20 жылдығына орай, яғни 1998 жылы бастау алған «Теріскей таланттары» халықтық өнер фестивалі биыл 20-шы рет ұйымдастырылып отыр. «Мыңжылқы» мәдениет сарайында. Фестивальді Созақ ауданының əкімі Салыхан Полатов құттықтау сөзбен ашып, Қ.Досымбековтің сөзіне жазылған С.Батырбековтің «Теріскей таланттары» əнінің тұсауы кесілді. Ауылдық жерлердегі жас таланттарды тауып, оларға қолдау көрсетуді, отансүйгіштікке баулуды көздеген фестивальға қатысушылар сегіз жанр бойынша сынға түседі. Яғни, «Сырлы саз әуендері» – эстрада жанры бойынша, «Зерлі қалам» – бейнелеу өнері қылқалам шеберлері, «Күміс керуен» – қолөнер шеберлері, «Сырлы дүние» – жыр мүшәйрасы және көркемсөз оқу, «Гауһартас» – халық әндері, «Сәукеле» – би, «Сахна иірімі» – драма жанры, сондай-ақ «Халық – өнер қайнары» ұжымдық көркемөнерпаздар байқауы арқылы таланттар анықталмақ. Фестивальдің ашылу салтанаты «Мерейіңмен, туған ел!» атты әдеби жүздесуге ұласып, теріскейде туған Ескермес Жақсымбетов, Есенбек Кенжеғараев, Мыңжасар Асқаров сынды ақындар өлеңдерін оқып, аудан əншілері елімізде кеңінен танылып үлгерген əндерін орындады.
Атап айта кетелік, қара күзге дейін созылатын фестивальдің жүлде қорына аудан əкімдігі тарапынан 2 миллион 500 мың теңге тағайындалған. Жеңімпаздар қорытынды гала-концертте марапатталады.
Сондай-ақ шара барысында «Халық – өнер қайнары» атты ұжымдық көркемөнерпаздар байқауының жүлдегерлері аудан орталығында арнайы концерттік бағдарламасын өткізеді.
Ғалымжан ЕЛШІБАЙ,
«Егемен Қазақстан»
Оңтүстік Қазақстан облысы
