Мұндай жағдайда тек шын мәнінде қуатты мемлекеттер ғана әлеуметтік инфрақұрылымды нығайтуын жалғастырып, өз азаматтарының өмір деңгейін одан әрі көтеруге қауқарлы. Елбасының бүгінгі «бес әлеуметтік бастамасы» Қазақстанның қуаты мен әлеуетін әлемге танытты.
«Президенттің бес әлеуметтік бастамасы» өркендеу үшін жаңа алғышарттар туғызады. Бұл ретте ол бұған дейін жарияланған және жүзеге асырылып жатқан жаңғыру идеяларымен жақсы қабысады.
Егер жіті үңілсек, Нұрсұлтан Назарбаевтың осы бастамалары, ең алдымен, ешкімге масыл болып қарап отырмайтын, қайта бойындағы бар әлеуетін қажетке жаратып, еңбек ететін, ілгері басатын, білім-ғылым игеретін барша жігерлі қазақстандықтарға арналғанын байқауға болады. Атап айтқанда, ресми табысы бар, бірақ баспанасы жоқ азаматтарға 7 пайыздық мөлшерлемемен 25 жылға жеңілдетілген ипотека берілмек. Жалақысы төмен саналатын жұмыскерлерге салынатын салық он есе азайтылып, 1 пайыз ғана болады. Мұндай игілікті тіпті дамыған елдерде табу қиын. Сонымен бірге ЖОО-ға түскісі келетін жастар үшін білім гранты 20 мыңға ұлғайтылады. Бес жыл ішінде ең кемі 75 мың студентті қамтитын жаңа жатақханалар қолданысқа берілуге тиіс. Бұдан бөлек, өз бизнесін ашқысы келетін іскер-ісмер жандарға биыл 62 миллиард теңге көлемінде шағын несиелер ұсынылады. Мұның барлығы халық тарапынан кең қолдау табарына сенемін. Өйткені кез келген ғасырда, кез келген қоғамда жаңғырудың ұстыны – экономикалық белсенді тұрғындар мен тиімді жұмыс жасайтын институттар болған.
Мәселен үйі болмай, күйі келмей жүрген отбасылардан рухани жаңғыруды, жаңа технологиялық серпінге септесуді сұрау қиын.Демек, бес бастама болашаққа да бағдарланып отыр. Ал еліміздің келешектегі даму бағдары мен бет алысы бүгінгі жаңғырулардың табысына тікелей байланысты болады.
Тағы бір назар аударар жайт, бірлік ұғымы Елбасының бүгінгі Үндеуінің өн бойына «алтын арқау» болып өрілген. «Бүгінгі бастамалар еліміз тұтас, қоғамымыз тұрақты болса ғана табысты жүзеге асады. Ал ел бірлігі – ең бірінші, қазақтың бірлігі. Жаһандық көштің басында жүретін мерейлі ел болу үшін бірлік пен ынтымақ алдымен өзімізге, қазаққа керек. Тарихтың өзі дәлелдеген бір ақиқат бар – халқымыз бірлікте болса күшейген, бірлігі қашса әлсіреген», – деді Мемлекет басшысы.
Ендеше азаттықтың ширек ғасырдан астам тарихында татулығы мен келісімін сақтай білген Қазақстан халқы үшін енді әрі қарай да айнымас ауызбірлігін, жарқын болашаққа ұмтылысы мен жасампаздығын бекемдей түсуі – парыз. Себебі Елбасы айтқандай, Үндеудің сыры – бірлікте, жүдеудің сыры – алауыздықта.
Бақытбек СМАҒҰЛ,
Ауған соғысы ардагерлері ұйымдары «Қазақстан ардагері» Қауымдастығының төрағасы
