![Жатақхана салу ісі пысықталуда](/article_photo/1521431923_article_b.jpeg)
Елбасының бес әлеуметтік бастамасын жүзеге асыруға байланысты атқарылып жатқан жұмыстар жайына арналған кезекті баспасөз мәслихаты жатақханалар салу мәселесіне арналған болатын. Оған Білім және ғылым вице-министрі Бибігүл Асылова және «Қаржы орталығы» АҚ президенті Асқар Ибраимов қатысты.
«Мемлекет басшысының халыққа Жолдауында және күні кеше ғана жарияланған 5 әлеуметтік бастамасында Елбасы жоғары білім сапасын арттыруға және студенттердің баспана жағдайын жақсартуға ерекше көңіл бөлген. Бүгінгі күні елдегі ЖОО-ларда білім алатын 530 мың студенттің 204 мыңы басқа қаладан келгендер. Бұл барлық студенттің 38 пайызы баспана мәселесін шешуді қажет ететінін білдіреді. Қазіргі уақытта олардың бір бөлігі қаржылық мүмкіндігіне қарай жалдамалы пәтерлерде тұрып жатыр, қалған бөлігі жатақханаларға орналастырылған», деді вице-министр Б.Асылова.
Оның айтуынша, бес әлеуметтік бастама аясында білім гранттарының ұлғайтылуы еліміздегі ЖОО-ларда білім алушылар санының артуына, ал бұл өз кезегінде жатақхана орындарын да көбейтуге алып келеді. «Сондықтан Президент 2022 жылдың соңына дейін студенттер жатақханасында 75 мың жаңа орын құруды тапсырды. Министрлік бұл тапсырмаларды орындау мақсатында барлық мүдделі тараптармен жиналыс өткізді. Нәтижесінде қол жеткен алдын ала жоспар жайында Білім және ғылым министрі Үкімет отырысында мәлімдеген болатын. Жалпылап айтар болсам, ЖОО немесе құрылыс жүргізуші мекеме жатақхана жобасын дайындап, олардың бірі «Қаржы орталығы» АҚ-пен келісімшарт жасайды. Оған сәйкес жатақхана пайдалануға берілген күннен бастап ЖОО немесе құрылыс жүргізуші мекеме белгілі бір жыл бойы бір орын үшін ай сайын төлем алып отырады, яғни құрылысқа жұмсалған шығындар өтеледі. Содан соң келісімшарт негізінде ЖОО немесе құрылыс жүргізуші ұйым банктен несие алып, жатақхана салуға кіріседі», деді Б.Асылова. Айтуынша, студент жастардың өмір сүру жағдайларын жақсарту мәселесін жекеменшік ресурстардың, оның ішінде жоғары оқу орындарының, колледждердің, инвесторлар мен басқа да серіктестердің ресурстары есебінен шешу көзделіп отыр.
Б.Асылова айтып өткендей, қазіргі кезде «Қазақстан Республикасының кейбір заңнамалық актілеріне студент жастардың өмір сүру жағдайларын жақсарту, сонымен қатар жан басына шаққандағы нормативтік қаржыландыру мәселелері бойынша өзгерістер мен толықтырулар енгізу туралы» заң жобасы әзірленіп жатыр. Жақында ол мүдделі мемлекеттік органдармен келісуге жіберілетін болады.
Бұдан өзге, Білім және ғылым министрлігі жатақханалар құрылысы жобаларын арзандату бағытын ұстанып отыр, себебі бүгінгі таңда ұсынылған жобалардың бағасы біршама көтеріңкі.
«Алдын ала жасалған есептеулер бойынша жатақханалар салуға шамамен 118 млрд теңге бөлінеді деп отырмыз. Бұл кезең-кезеңімен, сатылап берілетін қаражат. Келесі жылы 100 млн теңге бөлінсе, 2022-2026 жылдары 15 млрд теңгеден бөлінетін болады», деді вице-министр. Оның айтуынша, бұл жатақхана салудағы ең оңтайлы жоспар. Ал егер бұл мақсатты құрылыс болса, онда оған 118 млрд теңге емес, 225 млрд теңге бөлу қажеттілігі туындайтын еді, дейді ол. Сонымен қатар Б.Асылова жатақхана салу үшін банктен несие алу студенттердің оқу ақысына еш әсерін тигізбейтінін айтты.
«Біріншіден, ЖОО немесе тапсырыс беруші банктен несие алады, ал мемлекет жауапкершілікті өз мойнына алады. Сондықтан жатақхана салғаннан, гранттар санының артқанынан оқу ақысы қымбаттамайды», деген вице-министр студенттерде тек бұрынғыдай ай сайынғы жатақхана құнын төлеп тұру міндеттемесі ғана болатынын жеткізді.
Динара БІТІК,
«Егемен Қазақстан»