Әсіресе, бірінші бастама – қарапайым халықтың тұрғын үй алу мүмкіндігін күрт өсіретін өзгеріс қазірдің өзінде ел-жұрттың көңілінен шығып жатыр. Сөзім дәлелді болуы үшін нақты мысал келтірейін. Мәселен, күні бүгін Орал қаласында 303 мыңнан астам тұрғын бар, солардың 18 мыңдайы тұрғын үй алу кезегінде тұр. Солардың ішінде 2016 жылы – 833, 2017 жылы 612 тұрғын қоныс тойын тойлаған екен. Ал жаңа бағдарлама бойынша банкілер жылдық пайыздық мөлшерді 7%-дан асырмаса, алғашқы салым ретінде үй құнының 20%-ын ғана жинақтап, өз үйіне кіре алса және несиені қайтару мерзімі 25 жылға созылса, үйсіз жүрген тұрғындарға баспаналы болуға зор мүмкіндік туғызатыны айдан анық. Енді тек осы бастаманы өміршең қылу, соны жүзеге асыру жолдарын тезірек қолданысқа енгізу қажет.
Жастардың жоғары білім алуына қосымша 20 мың грант бөлу ұсынысын да ерекше ынтамен қабыл алдық. Олардың 11 мыңнан астамын техникалық мамандарды даярлауға бағыттау, елімізде төртінші өнеркәсіптік революцияны өміршең қылатын мамандар әзірлеуге толық мүмкіндік ашатыны – қуантарлық жайт. Ал 2020 жылға дейін жоғары оқу орындары мен колледждерге студенттік жатақхана салу туралы Елбасы тапсырмасы қазіргі күндегі өзекті мәселенің бірінің шешімін табуына үлкен серпін берер еді.
Орал қаласында жоғары оқу орындарында жатақханаға сұраныс жоғары. Тіпті колледждердің көпшілігінде жатақхана жоқ, барының сыйымдылығы төмен. Биыл облыс аумағындағы 38 колледжде – 19,5 мың студент білім алып жатыр. Ал олардың жатақханамен қамтылу деңгейі – 47,3%. Орал қаласында бұл көрсеткіш – 39,2% ғана. Соңғы кезде мемлекет тарапынан басымдық беріліп отырған жұмысшы мамандықтарына даярлайтын арнаулы оқу орындарына – Орал газ және салалық технологиялар, индустриялды және политехникалық колледждеріне жатақхана өте қажет. Осы мәселе шешімін тапса, қанша жас буын өкілдері алаңсыз оқуға мүмкіндік алар еді.
Елбасымыздың бес бастамасы да халқымыздың әл-ауқатының артуына, экономикамыздың алға серпінді дамуына толық жағдай жасайтынына кәміл сенеміз.
Мәлік ҚҰЛШАР,
Батыс Қазақстан облыстық
мәслихатының хатшысы
ОРАЛ
