Жиында Дін істері және азаматтық қоғам вице-министрі Б.Арын, Қазақстан мұсылмандары діни басқармасының төрағасы С.Ораз, Православтық шіркеудің митрополиттік округының ісін басқарушы, қаскелеңдік епископ Геннадий, Л.Гумилев атындағы ЕҰУ Әлеуметтік-мәдени даму жөніндегі проректоры Дихан Қамзабекұлы қатысты.
Б.Арын өз сөзінде «Бес әлеуметтік бастама» тікелей жастарға бағытталғандығына тоқталды. «Бұл құжат Президентіміздің серпінді ұсынысы, жас отбасыларға тұрғын үй алуға, жастардың жалақысын көтеруге, сапалы және қолжетімді білім беруге, кәсіпкерлікті дамытуға мүмкіндік береді. Елбасының бес әлеуметтік бастамалары еліміздің өркендеуі мен халқымыздың әл-ауқатын жақсартуға бағытталған. Ал бұның барлығы тұрақтылық орнаған мемлекетте ғана жүзеге аспақ. Ел дамуының негізі – мемлекет тұрақтылығы. Кез-келген елдің ілкімді дамуының басты кепілдігі оның бейбіт жағдайда тіршілік етуі екені белгілі. Яғни, қауіпсіздігін қамтамасыз ете алатын мемлекеттер ғана қарқынды өркендеу жолына іліге алады» деп атап өтті.
Осы ретте, Қазақстан мұсылмандары діни басқармасының төрағасы С.Ораз Мемлекет басшысына әлеуметтік реформаларды жүзеге асыруға, оларды жас ұрпақ үшін жасағанына құрмет білдірді. Бас мүфти: «Бірде пайғамбарымыз Мұхаммедтен бір кісі: «Уа, Алланың Елшісі, ең жақсы адам кім?» деп сұрайды. Сонда ол: «Ең жақсы адам – қоғамға, елге пайдасы тиген пенде» деп жауап берген. Демек, қазір біздің қоғамға өз ісінің майталман маманы бола білген иманды, жанашыр, дәстүрлі құндылықтарды құрметтейтін парасатты мұсылмандар қажет. Білім мен көркем мінезді, ар мен ұятты өз бойына ұялатқан ұрпақ елдің көсегесін көгертеді» деді.
Православтық шіркеудің митрополиттік округының ісін басқарушы қаскелеңдік епископ Геннадий Президенттің жариялаған Үндеуі ең алдымен халықтың әлеуметтік әл-ауқатын нығайтуға және біздің мемлекетімізде өмір сүру үшін қолайлы жағдай жасауға, әлеуметтік блоктың міндеттерін шешуге бағытталғанын атап өтті. «Мемлекет басшысы қоғамның талаптары мен көңіл-күйіне аса көңіл бөлетіндігін тағы бір рет көрсетті. Жастар саласы өте сезімтал және барлық жаңа нәрселерді қабылдайды. Сондықтан, бұл құжат азаматтардың осы санатына толығымен бағытталған және олардың өсуі мен тұрақтылығы үшін қолайлы жағдайлар жасалған» деді ол.
Әлеуметтік бастамаларды талқылау барысында студенттер тарапынан көптеген сұрақтар қойылып, олардың барлығына қызықты да шынайы жауаптар берілді. Қойылған сұрақтар қатарында дін өкілдернің несие алуға деген көзқарасы, Қазақстандағы теологиялық білім алу және басқалар қамтылды.
