Сейсенбі күнге дейін Шымкент қалалық жұқпалы аурулар ауруханасына жіті ішек инфекциясымен 188 адам түскен. Олардың 101-і ересек, 39-ы балалар болса, 48-і жасөспірім. Ал 3 сәуірде науқастардың 99-ы үйлеріне қайтарылған. Қалған науқастардың жағдайлары орта дәрежеде. Алдағы күндері тағы 50-60 науқас ауруханадан шығарылмақ. Бұл деректерді Оңтүстік Қазақстан облыстық денсаулық сақтау басқармасының басшысы Мұқан Егізбаев арнайы брифингте мәлім етті. Басқарма басшысының айтуынша, дер кезінде дәрігерлердің көмегіне жүгінген науқастар басым. Дегенмен үйде өзінше емделгенінен нәтиже шықпай дәрігерге кеш келгендер де аз емес.
Шымкент қаласы тұрғындарының улануына, бұдан бұрын хабарлағанымыздай, «Южное» дәмханасына қарасты дүңгіршектен сатылған құймалы балмұздақ себепкер болып отыр. Денсаулық сақтау министрлігі Қоғамдық денсаулық сақтау комитеті ОҚО департаментінің басшысы Нұрбек Нышановтың мәлімдеуінше, аталмыш дәмханаға жоспардан тыс тексеру жүргізілген. Сатылып жатқан өнімдердің сынамалары, жабдықтардың сүртінділері алынып, бірқатар кемшіліктер анықталған. «Балмұздақ киоскісі елеусіз нысан ретінде саналады. Яғни жоспарлы тексеруге жатпайды. Бірақ балмұздақ дүңгіршегінің иесі нысанды іске қосар алдында жергілікті басқармаларға хабарлама беруі тиіс еді. Ол хабарлама бермеген. Сондықтан қызметкерлері, нысан тексерілмеген. Қазір осыған байланысты әкімшілік іс қозғалды. Дүңгіршек жұмысы сот шешімі шыққанша тоқтатылды. Осы оқиғадан кейін балмұздақ, тез бұзылатын өнімдер сататын сауда орындарымен тиісті жұмыстар облыс бойынша жүргізілуде», деді Н.Нышанов. Тұтынушыларын төсекке таңған балмұздақ үйде дайындалған екен. Департамент басшысының айтуынша, үйде дайындалған өнім полиэтилен ыдыспен және жеке көлікпен тасымалданған. Яғни ешқандай талап сақталмаған. Сондай-ақ балмұздақ сататын нысандағы 5 қызметкердің біреуінің ғана медициналық кітапшасы бар. Қысқасы, кәсіпкер өз ісіне жауапсыз және салғырт қараған. Бұл орайда ОҚО кәсіпкерлер палатасының директоры Асқар Әбубәкіров қоғамдық тексеруді күшейту қажет деп есептейді.
Ал Оңтүстікте балмұздақтан уланған адамдардың жағдайына қатысты пікір білдірген Денсаулық сақтау министрлігі Қоғамдық денсаулық сақтау комитетінің төрағасы Жандарбек Бекшин шағын және орта бизнес нысандары айтарлықтай емес эпидемиологиялық маңыздағы орындарға жататынын, олар тек халықтың шағымы түскен уақытта немесе қандай да бір төтенше жағдайлар туындағанда ғана тексерілетінін айтып өтті. Алдағы уақытта еліміздегі жұмсақ балмұздақ сататын барлық нысандар тексерілетін болады. «Біріншіден, бұл нүкте жабылды. Екіншіден, материалдар тергеу органдарына тапсырылып, Оңтүстік Қазақстан облысының ішкі істер басқармасы тексеріс аяқталғаннан кейін осы орынды ашып, сапасыз өнімді сатқан жеке кәсіпкер Ешмұратовтың кінәсі қаншалықты екенін анықтайтын болады», деді Ж.Бекшин журналистерге берген сұхбатында.
Айта кетелік, Оңтүстік Қазақстан облысының әкімі Жансейіт Түймебаев ауруханаға барып, жіті ішек инфекциясымен түскен науқастардың жағдайын білген болатын. Одан кейін жедел штаб отырысын өткізген облыс әкімінің тапсырмасымен арнайы жұмыс тобы құрылып, қызметтік тексеру шаралары жүргізілуде. Сондай-ақ штаб отырысында болған оқиғаның себеп-салдары талқыланды. Мамандардың айтуынша, жіті ішек инфекциясы санитарлық эпидемиологиялық талаптардың сақталмауынан болған.
Ғалымжан Елшібай,
«Егемен Қазақстан»
Шымкент
