Көкшетау қаласында Ж.Мусин атындағы жоғары қазақ педагогикалық колледжінде «Латын графикасына көшу – оқушылардың функциялық сауаттылығын дамыту құралы» тақырыбында практикалық семинар өтті. Оған Ш.Уәлиханов атындағы Көкшетау мемлекеттік университетінің ғалым-филологтары, аталған колледж ұстаздары және Ақмола облысы мектептерінің пән оқытушылары қатысты. Елбасы «Болашаққа бағдар: рухани жаңғыру» атты мақаласында латын әліпбиіне көшу себебін қазіргі заманғы технологиялық ортаның, коммуникацияның, ХХІ ғасырдағы ғылыми және білім беру процесінің ерекшеліктеріне байланысты екендігімен түсіндірген болатын. Осы тұрғыдан келгенде ұстаздар қауымы латын графикасына өтудің терең логикасына үңіліп көрді. Атап көрсеткендей, латын қарпіне көшу – Қазақстан үшін тарихи қажеттілік, әлемдік ғылыми және технологиялық процестерге қосылудың тағы бір мүмкіндігі.
Ш.Уәлиханов атындағы Көкшетау мемлекеттік университетінің филолог ғалымдарымен болған пікір алмасу барысында ел тарихындағы осындай іргелі оқиғалардың әдіснамалық аспектілері және негізгі міндеттері кеңінен сөз болды. Ең бастысы, педагогтер латын графикасына көшу жағдайында тілдерді оқыту әдістемесін әзірлеудің және әлемдік ақпараттық кеңістікке шығудың негізгі жолдарымен танысты. Әсіресе қазір әлемде тілдерді жеңілдету үшін барлық жағдай жасалуда екендігі ерекше аталды. Тіпті қазақ тілінде әлемнің кез келген нүктесінде тұрып та гаджетте жазуға мүмкіндік бар. Қазір заманауи технологияның дамып кеткені сондай, онлайн режімінде кез келген мәселелерді шеше беру де ешқандай қиындық тудырмайды. Осы тұрғыдан келгенде латын графикасының арқасында шет тілдерін жеңіл игеруге үлкен мүмкіндік туып отыр. Оның үстіне әлемдегі ақпараттардың 80 пайызы латын графикасымен таратылатындығы белгілі. Бұл ретте жастардың жаңа тілдерді, оның ішінде ағылшын тілін меңгеруге көшуі маңызды. Жастардың тілдерді еркін меңгеруі бағытында Ж.Мусин атындағы колледж педагогтері арнайы әдістемелік әзірлегендігін де айта кету керек. Сонымен қатар педагогтер латын графикасына көшу бойынша студенттерді оқытудағы жұмыс тәжірибесімен де алмасты.
Асқар ТҰРАПБАЙҰЛЫ,
«Егемен Қазақстан»
Ақмола облысы
