«Рухани жаңғыру» аясында былтырғы өткен 143 іс-шараның басым бөлігі жергілікті демеушілердің қолдауымен жүзеге асқан. Соның ішінде «Қазақстанның жеті кереметі» туристік-өлкетану аймақтық экспедициясы, «Жас экологтер» мен «Менің елім – Қазақстан» республикалық форумы, колледж студенттері арасында «Рухани жаңғыру – болашақтың кепілі» фестивалі, балалар мен жасөспірімдер ансамбльдерінің шеруі, «Туған өлке News» аймақтық медиа-форумы, «Білім. Туризм. Интеграция» халықаралық ғылыми-практикалық конференциясы өтті. «Атамекен» кіші бағдарламасы бойынша барлығы 93 жоба тізілімге еніп, соның 67-сі мәреге жетті. «Әлеуметтік бастамалар картасы» аясында кәсіпкерлер тарапынан 60 жоба жасалды. Сөйтіп Ақсай қаласында спорт кешені, Бөрлі ауданында балабақшалар, Қазталов ауданында 12 млн теңгеге ашық аспан астындағы музей бой көтерді.
«Рухани қазына» кіші бағдарламасы бойынша өңірде Қазақстан бойынша алғаш рет Батыс Қазақстан облысында «Рухани жаңғыру» музейі ашылды. Сонымен қатар облыс аудандарына экспедиция жүргізу арқылы Қазақстанның виртуалды картасы үшін қасиетті нысандардың GPS координаттары анықталып, «Қасиетті Қазақстан» ғылыми-зерттеу орталығына берілді.
Биыл бағдарлама аясында 414 іс-шара жоспарланып отыр. Бұл жобалар да негізінен демеушілер есебінен жүзеге аспақ. «Тәрбие және білім» кіші бағдарламасы бойынша 88 іс-шараға 60 мыңға жуық адам тартылады. «Ұлы Жібек жолы – ұлы достық жолы» атты Орал-Сарайшық-Атырау-Пятигорск бағытымен халықаралық тарихи экспедиция жолға шығады.
Ұлттық кодымызды сақтаудың бір жолы ретінде Батыс Қазақстан облысында домбыраны кеңінен насихаттау қолға алынды. Мектептерде домбыра үйірмелері ашылып, үзілістік қоңырау орнына күй әуені ойнатылады. Мамыр айының екінші онкүндігінде Домбыра күнін өткізу жоспарланған.
Облыста меценаттардың көмегімен 247 жоба атқарылмақ. Олардың ішінде ауылдық мәдениет үйі, сауықтыру кешені, таза ауыз сумен қамту жүйесі секілді ірі жобалар да бар. Осындай үлкен жоба – Шыңғырлау өзенінен өтетін көпір құрылысын кәсіпкер Мирболат Тасмағамбетов салып, ауылдастарына сыйлап үлгерді.
Республикалық жалпыұлттық қасиетті нысандары қатарына кірген ортағасырлық Жайық қалашығы, Бөкей ордасы тарихи-музей кешені, Алаш музейі, Тақсай обалар кешені, Жұмағазы хазірет, ақын, қоғам қайраткері Ғұмар Қараш пен күйші-композитор Дәулеткерей кесенелеріне ерекше назар аударылып, көңіл бөлінетін болады. Сырым ауданындағы Алаш музейі күрделі жөндеуден өтті. Ғұмар Қараштың басына кесене тұрғызылмақ. Жайық қалашығы аумағына ортағасырлық стильде кіреберіс қақпа орнатылады. Бұл соңғы аталған жұмыстар демеушілердің көмегімен жүзеге асырылмақ.
Қазбек ҚҰТТЫМҰРАТҰЛЫ,
«Егемен Қазақстан»
ОРАЛ
