Президент туралы сөйлегенде, толқымай кету мүмкін емес. Өйткені, ол – Қазақстанның тәуелсіз ел болуының іс жүзіндегі негізін қалаушы. Тәуелсіз мемлекетке тән барлық негіздер мен атрибуттар Мемлекет басшысының тікелей араласуымен жасалды. Бір қоғамдық-экономикалық формациядан екіншісіне ауысу әлемдік тарихта қантөгіссіз болған емес. Біздің маңымыздағы жақын елдерде де түрлі атыс-шабыстар мен олардан адамдардың тақсырет тартуы және зардап шегуі орын алды. Тек бізде ғана бір оқ шықпай, бір адам қайғы шекпей бір формациядан екіншісіне ауысу жүзеге асты.
Қазақстан жыл емес, тіпті ай да емес, күн өткен сайын ертегідегі батырлар секілді өсіп, аяғынан нық тұрды. Тәуелсіздік алғанымызға 10 жыл толғанда-ақ біз ешкімге жалтақтамайтын берік ел болатынымызға көзіміз жетті. Президенттің тәуелсіз ел орнату жолындағы саясаты барлық сынақтарға төтеп беріп, барлық қиындықтарды еңсеріп кетті. Біз қазір әлемдік экономиканың ауқымына алқынбай еніп, дамудың тұрақты жолына түсіп отырмыз. Көптеген мәселелер бойынша халықаралық қоғамдастық Қазақстанды көшбасшы ел ретінде таниды. Соның бәрі тек 20 жыл ішінде қол жеткізілген табыстар.
Әрине, Президент Нұрсұлтан Назарбаев өз халқын бақытты ету, елін еңселендіру идеяларын ғана басына сіңіріп қана қоймай, ойға алғандарын іс жүзіне асыратын аса дарынды адам болмаса, мұндай табысқа жету тіпті де мүмкін болмас еді.
Қысқасы, Нұрсұлтан Әбішұлы, қалай айтса да артықтық етпейтін жетістіктерге қол жеткізді. Сондықтан бүгінгі марапат тіпті бұдан бес, тіпті он жыл бұрын берілсе де орынды болар еді. Бірақ, «ештен кеш жақсы» демекші, айтулы марапат нақты иесін тауып отыр. Біздің шешіміміз жүрегіміздің түбіндегі ең асыл, ең ақ ниетімізден шыққанына иненің жасуындай да күмән жоқ. «Халық Қаһарманы» болуға ең лайықты жан Елбасы екені айдан анық жәйт.
Александр САВЧЕНКО, Парламент Сенатының депутаты.