«Атамекен» кіші бағдарламасы аясында «Асар» үшжақты әріптестік республикалық форумы өтіп, өңірдегі қоғамдық сектордың дамуына үлкен серпіліс берді.
«Туған жерге тағзым» жобасының аясында облыстың аудандарында жерлестер форумдары өтіп, 6 балабақша мен 8 спорт кешені пайдалануға берілді. Атырау мұнай және газ университетінде Балғымбаев ғылыми орталығының құрылысы жүруде.
«Рухани қазына» кіші бағдарламасы бойынша өңірге ел зиялылары шақырылып, шығармашылық жобалар жүзеге асты. Асанәлі Әшімов, Мырзатай Жолдасбеков, Нұрлан Оразалин, Ғафиз Есімов, Алтынбек Қоразбаев, Құман Тастанбеков пен Меруерт Өтекешова, Айгүл Үлкенбаева, Болат Қохаманов, Татьяна Бурмистрова секілді әдебиет, өнер тұлғаларының шығармашылық кештері мен концерттері атыраулықтарға ұмытылмас әсер сыйлады.
– Елімізде алғаш рет Арқа, Батыс, Сыр, Жетісу және Алтай-Тарбағатай ән мектептерін бір арнаға тоғыстырған «Ән дария дүлдүлдері» І республикалық дәстүрлі әншілер байқауы, «Мәңгілік елдің алтын адамы» атты республикалық театрлар фестивалі, «Қайта жаңғырған Қазақстан» тақырыбында халықаралық ақындар айтысы, «Жайық нұры» республикалық академиялық әншілер байқауы, Д.Нұрпейісова атындағы «Бұлбұл домбыра» республикалық қыз-келіншектер байқауы да «Рухани жаңғыру» бағдарламасының аясында ұйымдастырылды, – дейді облыс әкімінің орынбасары Нұрсәуле Сайлауова.
Өлке тарихын зерделеуге арналған «Ибн Батутаның Ұлы Жібек жолымен саяхаты: мәдениеттер арасындағы диалогты алға бастыру» тақырыбындағы халықаралық ғылыми-практикалық конференциясы, «Нұр Отан» партиясының бастамасымен жүзеге асқан «Ақмешіт – Бекет ата» экспедициясы арқылы біраз жаңа мәліметтер жиналды.
Облыстың архив құжаттары мен тарихи-мәдени ескерткіштерін зерттеу және қорғау жұмыстарының мамандары Ресейдің Мәскеу, Санкт-Петербург, Астрахань, Орынбор қалалары мен Татарстан, Башқұртстан республикаларының мемлекеттік архивтерінен еліміздің тарихына қатысты құжаттарды іздестіру мақсатында ғылыми іс-сапарларда болды. Нәтижесінде, «Каспий маңы қазақтарының мәдениеті мен тұрмысы: ХХ ғасырдың 20 жылдарындарындағы фотоқұжаттарда» атты кітап-альбомы жарыққа шықты.
– Өңірде көлемді археологиялық қазба жұмыстары жүргізілді. Нақты айтқанда, Миялы қорғандары, Сарайшық және Ақтөбе-Лаэти ортағасырлық қалашықтарына ғылыми археологиялық зерделеу жұмыстары жасалды, – дейді облыс әкімінің орынбасары Нұрсәуле Сайлауова. – Ұлттық спорт түрлерін дамыту мақсатында І республикалық «Дарабоз» жаппай көкпар сайысы өтті. Демеушілер есебінен облыс орталығында «Ретро» саябағы ашылды. Еліміздің ұлы ғалымдарын насихаттау мақсатында «Ағартушылар» көп сериялы тарихи-деректі фильмі түсірілді. Мұның бәрі «Рухани жаңғыру» бағдарламасының игілігі.
«Қазақстанның киелі жерлерінің географиясы» жобасына облыстан 7 нысан енгізілді. Олар: Сарайшық қалашығы, Ақмешіт, Ұшқан ата және М.Өтемісұлының кесенелері, Аралтөбе қорымы, Құлшан ата жер асты мешіті және Иманқара үңгірі.
Атырау облысы әкімдігі Мәдениет және спорт министрлігімен бірлесе көне Сарайшық қаласын сақтап қалу, зерттеу және өзен жағасын бекіту бойынша ауқымды жобаны жүзеге асыра бастағанын айта кеткен жөн. Бұл жұмыстарға жергілікті бюджеттен 1,6 млрд теңге бөлінді. Биыл жұмыс аяқталып, қалашық орнына этномәдени музей кешені салынады, осы арқылы ішкі және сыртқы туризмнің дамуына кең жол ашылмақ.
«Жаһандағы заманауи қазақстандық мәдениет» арнайы жобасы аясында өңірдегі шығармашылық ұжымдар қазақстандық мәдениетті әлемге таныту мақсатында Үндістан, Македония, Португалия, Малайзия, Ресей, Түркия, Венгрия, Сербия мемлекеттерінде өнер сапарында болды.
«Латын әліпбиіне көшу» арнайы жобасы бойынша тұрғындарға ақпараттық түсіндіру жұмыстары жүргізіліп, сарапшылар топтарының қатысуымен 300-ден аса іс-шара ұйымдастырылды.
Осындай игі жұмыстар қатары биыл да жалғасын тауып жатыр. Облыс әкімінің орынбасары Н.Сайлауованың айтуынша, «Рухани жаңғыру» аясында 2018 жылы 6,1 млрд теңгеге 175 жоба жоспарланған. 500-ге жуық іс-шара ұйымдастырылып, 300 мыңнан аса адам қамту көзделуде.
Бақытгүл БАБАШ,
«Егемен Қазақстан»
АТЫРАУ
