Қазақстан Республикасының Тұңғыш Президенті Нұрсұлтан Әбішұлы Назарбаев – елдің бірлігін, азаматтардың конституциялық құқықтары мен бостандықтарын қамтамасыз еткен аса жауапты тұлға. Жаңа Тәуелсіз мемлекеттің негізін қалаушы ретінде Президентті әлем мойындады, әлемдік саяси аренада Елбасының қайраткерлігі мойындалды. Ол Қазақстан халқы тарапынан зор сенімге ие.
Мемлекет басшысының кемел сараптауымен жүргізілген сыртқы және ішкі саясаты нәтижесінде Қазақ елі айтарлықтай экономикалық өсуге, халықтың әл-ауқатын арттыруға қол жеткізді. Бүкіл әлемдік қоғамдастықта биік беделге ие болды.
Біз, Парламент Сенатының депутаттары Қазақстан Республикасының 2000 жылғы 30 шілдедегі «Қазақстан Республикасының Тұңғыш Президенті – Елбасы туралы» Конституциялық заңның І-бап, 3-тармақшасына: «Қазақстан Республикасының Тұңғыш Президенті – Елбасы лауазымы мен мәртебесі бойынша айрықша ерекшелік белгісі «Алтын Жұлдыз» және «Отан» ордені тапсырылатын «Халық Қаһарманы» атағының иегері болып табылады» деп өзгеріс енгіздік.
Сондай-ақ, «Қазақстан Республикасының мемлекеттік наградалары туралы» Заңға толықтыру енгіздік. Мемлекет басшысының дана және сындарлы саясатының арқасында Қазақ елі әлемдік қоғамдастықта жоғарғы беделге ие болды. Оған өткен жылғы Қазақстанның ЕҚЫҰ-ға төрағалық еткені жарқын дәлел. Қазақстан мүддесін ең алдыңғы орынға шығара білген Нұрсұлтан Назарбаев елімізді аса қысқа мерзімде әрі бұралаңы көп қиын кезеңде күллі әлемге таныта білді, төтелеп келген талай қиыншылықтан алып шықты.
Қазақ елі мен оның Көшбасшысы Нұрсұлтан Назарбаевтың әлем алдындағы абыройының биіктігі, беделінің асқақ, сөзінің өтімділігі мен пікірінің пайымдылығы сияқты қасиеттерін дүние жүзі түгел танып, адамзат өркениетінің алдындағы өрлігін мойындап отыр. Осы жылдары Президентпен бірге еңбек ету мен үшін өмірімнің есте қаларлық ерекше сабақтарына айналды.
Біз бүгін Елбасының мәртебесіне арналған заңдарға өзгерістер енгізе отырып, Қазақстан Республикасының Тұңғыш Президентіне «Халық Қаһарманы» атағын беру туралы шешім қабылдау арқылы барлық қазақстандықтардың өз Мемлекетінің басшысына деген тілегін орындадық. Біздің бұл шешіміміз тарихи шешім деп есептеймін.
Нұрлан СҮЛЕЙМЕНОВ, Парламент Сенатының депутаты.