Фото: Орынбай БАЛМҰРАТ, «Егемен Қазақстан»
Осы жиында айтылғандай, елорда экономикасындағы шағын және орта бизнестің үлесі 57,4 пайызды құрап, өткен жылмен салыстырғанда 12 пайызға артқан. Бұл бағытта инвестиция көлемі де 10 пайызға ұлғайып, 944 млрд теңгеге жетті. Жалпы, қалада 100,8 мың кәсіпкерлік субъектілері тіркелген, онда 325,2 мың адам жұмыс істейді. Ескеретіні кәсіпкерлердің басым бөлігі сауда саласы, сервистік қызмет көрсетумен айналысады.
Астана қаласы кәсіпкерлер палатасының директоры Ғани Тасмағанбетов өндіріс ошақтарының санын арттыру мақсатында келер жылдан бастап бас қалада бірегей жоба іске қосылатындығын мәлімдеді. Оның айтуынша, 2020 жылы көлемі 440 гектар жерді қамтитын екінші индустриялық аймақты құру жоспарланып отыр. Шағын және орта кәсіпкерлікке арналған дайын өндіріс орындарында экономиканың тетігі саналатын барлық салалар қамтылады деп күтілуде. Бастама жүзеге асса 18 мың халық жұмыспен қамтылып, шағын және орта бизнесте 130 кәсіпорын іске қосылмақ.
Ұлттық кәсіпкерлер палатасы бүгінгі таңда еліміздегі кәсіпкерлерді қолдап, олардың ісінің оңға басуына дәнекер болып отырғандығы белгілі. «Атамекен» палатасының 2013-2017 жылдар аралығында кәсіпкерлікті қорғау бағытында бизнес өкілдерінен 22 мыңнан астам өтініш түсіп, оның 40 пайыздан астамы оң шешімін тапқан. Нәтижесінде, айыппұлдар мен мемлекеттік органдардың кәсіпкерлерге қайтарған қаржысы, бизнестің қорғалған дүние-мүлкінің құны 92 млрд теңгені құраған. Ал қала бойынша 312 шағым түсіп, оның 100-ге жуығы кәсіпкерлер пайдасына шешілген. Жалпы бір жыл ішінде кәсіпкерлерге араша түсудің арқасында 4,77 млрд теңге үнемделіп отыр.
− Астана қаласы кәсіпкерлер палатасы өндірушілермен кездесіп, туындаған түйткілді мәселелерді шешу жолдарын қарастырады. Бүгінгі таңда көптеген кәсіпорындарда өз өнімдерін сатуда қиындықтар туындайды. Осы орайда мемлекеттік сатып алуды реттейтін арнайы комиссия бар екендігін, оған 200-дей кәсіпкер келіп, өз өнімдерін сату мәселесін жолға қойғандығын айтқым келеді. Өткен жылы 2 млрд теңгеге ұсыныс берілсе, биылғы жылы 3 айдың ішінде 400 млн теңгеге отандық кәсіпкерлердің өнімдерін алуға ұсыныс беріп отырмыз, – деді Ғани Тасмағанбетов.
Бұған қоса, палата ұсынған жеті бастаманы тілге тиек еткен ол жер учаскелері, электр қуаты және инженерлік-коммуникациялық желілерге қосылу туралы ақпаратты онлайн алу мүмкіндігі барын еске салды. Қазіргі уақытта осы бағыт бойынша Астана қаласы сәулет және қала құрылыс басқармасының www.saulet.astana.kz және www.genplan.saulet.astana.kz сайттарында интерактивті карта орналастырылған. Картаға Астана қаласының бас жоспары мен түбегейлі жоспар жобасы, тіркелген жер учаскелері, бос жер учаскелері, аукционға шығарылатын жер учаскелері, қызыл сызық және тағы басқа ақпараттар енгізілген.
Қала ішінде сауда-саттық жасау және қоғамдық тамақтану бойынша 600 орын кәсіпкерлерге беріліпті. Жалпы, Қазақстанда «Көше саудасы – 1000 сауда орны», «ASTANA TAXI», «Газ, жанар-жағармай жобасы», «5 мың тонналық көкөніс сақтау қоймасы», «Сапаржай-Астана» ЖШС, «Целинсельмаш Астана» ЖШС жекешелендіру жобасы», «Астана азық-түлік белдеуін қамтамасыз ету» сынды жобалардың сәтті іске асқандығын уақыт көрсетіп отыр.
Еркежан АЙТҚАЗЫ,
«Егемен Қазақстан»
