Тұлғаларға лайықты құрмет көрсету – қоғамның парызы. Осындай тұлғалардың бірі – Қасымбек Медиұлы Медиев.
Мен Ұлытау өңірінің тумасымын. Әкем де, анам да Қарағанды мемлекеттік педагогикалық институтын бітірген ұстаздар. Әкем соғыс және еңбек ардагері, 40 жыл саналы өмірін ұрпақ тәрбиесіне арнады. Анам 1955 жылы аудандық партия комитетінің жолдамасымен жаңадан ашылып жатқан Мибұлақ ауылына қарасты №20 Ақкеңсе сегізжылдық мектебіне директор болып тағайындалады. Сол жерде туып-өсіп, 1982 жылы Жезқазған педагогикалық институтын бітіріп, еңбек жолын өзім бітірген №9 Мибұлақ орта мектепте бастадым. Өзіме сабақ берген ұстаздарыммен бірге жұмыс жасадым. 1986 жылы мектеп директорының тәрбие ісі жөніндегі орынбасары болып жүргенмін. Осы жылдың қаңтар айында жаңадан сайланған Жезді аудандық партия комитетінің бірінші хатшысы Қасымбек Медиұлы жұмыс сапарымен білім мекемесінің материалдық-техникалық базасымен, оқу-тәрбие жұмыстарының жағдайымен танысты. Мектеп жанындағы интернатты аралап шопандардың балаларының тыныс-тіршілігімен танысты. Абзал ағамен таныстығымыз осылай басталды.
1986 жылдың наурыз айында Жезді аудандық комсомол комитетіне хатшы болып сайландым. Содан бері 32 жыл уақыт өтіпті. Осы мерзімде аудандық партия комитетінің хатшылары: қоғам қайраткері Мұханбет Көпеев, Майра Серкебаева, марқұм Аманжол Кенжебаев еңбек етті. Ол кезде Жезді аудандық комсомол комитетін қазіргі Парламент Сенатының депутаты, іскер басшы, білгір ұйымдастырушы Рысқали Қалиакбарұлы Әбдікеров басқарды. Осындай азаматтармен бірге елді көркейту жолында қоян-қолтық жұмыс істедік.
Аудандық комсомол комитетінің жастар арасындағы жұмыстары облыс көлемінде алдыңғы қатарда болды. Турасын айтқанда, комсомол өмір және тәрбие мектебіне айналды. Болашақ ел тұтқасын ұстаған азаматтар осы ұйымның арқасында шыңдалды. Сол кезде облыс, қала, аудан көлемінде комсомол комитеттерінде қатар еңбек еткен қыз-жігіттер: Ерлан Қошанов, Серік Шайдаров, Қанат Балмағанбетов, Жағыпар Бабатаев, Дәуір Оразбеков, Салтанат Абеуова, Алма Құлжанбекова, Перуза Абаева, т.б. қазіргі кезде әр салада жемісті еңбек етіп жүр.
Жезді ауданы – ауыл шаруашылығы жан-жақты дамыған ірі аудандардың бірі. Ауданға келген күннен бастап Қасымбек Медиұлы өзінің іскерлігін ұйымдастыру қабілетінің жоғары екендігін таныта білді. Маңайына тек іскер, жұмыс істейтін кадрларды жинады. Уақытпен қатар жүру, заман талаптарына сай болу, жұмысқа бар білімін, тәжірибе мен жанын салу қызмет атқару кезеңі барысында айқын көрінді.
Аудан экономикасы мен мәдениетінің, халықтың әлеуметтік-тұрмыстық жағдайының жақсаруына, ауыл өмірінің гүлденуіне қолынан келген көмегін аяған жоқ. Елді мекендерді сәулеттендіруге ерекше көңіл бөлді. Аудан орталығы адам танымастай болып өзгерді. Көшелер мен үйлер тәртіпке келтірілді, көшелер асфальтталып, қызыл-жасылды шамдар орнатылды. Аудан жоғары вольтті электр энергиясына қосылып, теледидар мұнарасы орнатылды, жаңадан үйлер салынды. Байқоңыр, Пионер, Қарақұм совхозаралық тас жолдар пайдалануға берілді. Балаларға арналған «Ертегілер қалашығы» бой түзеді. Тікелей басшылығымен аудан орталығында Ұлы Отан соғысында қаза тапқан жауынгерлерге ескерткіш орнатылып, «Даңқ» аллеясы ашылды. Аудан, қалалық бірінші хатшылардың тәжірибе алмасу облыстық семинарлары, Ресейдің Қазақстандағы онкүндігіне арналған фестивальдер өткізілді. Қасекең басқарған жылдары облыс, республика бойынша көрсеткіші ең жоғары ауыл шаруашылығы, оның ішінде мал шаруашылығы дамыған аудандардың біріне айналып, әр саулықтан жүз қозы алынды. Ауыспалы Қызыл Туды үнемі жеңіп алып отырды.
Жезді ауданын басқарған кезең Қасымбек Медиұлының шырқау шағы болды. Соның айғағы Кеңес Одағында Мәскеуде өткен ХІХ партия конференциясына Жезқазған облысынан екі делегат сайланса, соның бірі – Қасымбек Медиев. Бұл ауданның экономикалық өсуіне, мәдени дамуына берілген үлкен баға еді. Кейін Қ.Медиев Жезқазған облыстық партия комитетіне екінші хатшы, Қазақстанның Жоғарғы Кеңесіне екі мәрте депутат болып сайланды. Зейнеткерлікке шыққанға дейін Қарағанды облыстық мәслихатының хатшысы қызметін атқарды.
Қ.Медиұлының ауданда атқарған жұмысын айту парызым деп білемін. Ол кісіден үйренгеніміз көп. Жүрегінің тазалығы мен жастарға деген риясыз қамқор пейілі мен үшін өмірлік өнеге болып қалды. Бүкіл өмір, еңбек жолы осы өңірлердің өркендеуімен тығыз байланысты. Шет ауданының аудан мәртебесін сақтап қалуы да Қ.Медиұлының еңбегі дер едім. Осындай халқы үшін қалтқысыз қызмет еткен азаматтарға қандай құрмет көрсетсек те жарасады емес пе!
Нұрхан ЖОЛАШАР
Жезқазған қаласы
