«Егемен Қазақстан». 1996 жыл. Дүйсенбі, 16 желтоқсан.
Президенттің өз қолынан жоғары наградалар алды
«Егемен Қазақстанның» осыдан 15 жыл бұрынғы, яғни 1996 жылдың 16 желтоқсанындағы нөмірі жоғарыдағыдай тақырыппен ашылыпты. ҚазТАГ-тың бұл хабарында желтоқсанның 15-інде Президент Нұрсұлтан Назарбаев өз резиденциясында қазақстандықтардың бір тобына Мемлекеттік наградаларды тапсырғандығы, бұл наградаларға олардың Отанға сіңірген еңбектері үшін және республика тәуелсіздігінің бес жылдығына байланысты ие болғандығы айтылады.
«Осы салтанатты рәсімді аша келе еліміздің басшысы егемендіктің бес жылы оңайлықпен өтпегенін айтты. Алайда наградамен атап өтілген азаматтардың бәрі де жүргізіліп жатқан реформаларға белсенді қолдау көрсетті, мемлекетті нығайтысты, халықпен бірге оның уайымы мен шаттығын бөлісті. Халық әртісі Роза Бағланова, Қайрат Рысқұлбековтің анасы Дәметкен Асанбаева Президенттің қолынан «Халық қаһарманының» Алтын Жұлдызын алды. Дәметкен ананың ұлына бұл жоғары награда 1986 жылғы Желтоқсан оқиғаларында Республика азаттығы мен тәуелсіздігі жолында көрсеткен азаматтық ерлігі үшін, қайтыс болғаннан кейін беріліп отыр» делініпті.
Хабарда «Отан» ордені «Қазақстан жолдары» АҚ президенті Шәміл Бекболатовқа, Абай атындағы Қазақ мемлекеттік академиялық опера және балет театрының бас режиссері Байғали Досымжановқа, А.Байтұрсынов атындағы Тіл білімі институтының директоры Әбдуәли Хайдаровқа тапсырылғандығы, ҚР Әскери Әуе Күштерінің қолбасшысы Мұхамеджан Ыбыраевқа «Даңқ» ордені берілгендігі айтылады.
Ал белгілі өнер және мәдениет қайраткерлері Әлібек Дінішев, Кәукен Кенжетаев, Мүлік Сүртібаев, ақын Леонид Кривошеков, Алматы қаласының әкімі Шалбай Құлмаханов, суретші Сабыр Мәмбеев, журналист Валерий Михайлов, мүсінші Хакімжан Наурызбаев, Парламент Сенатының депутаты Дәулет Сембаев, Сыртқы істер министрі Қасымжомарт Тоқаев, Әл-Фараби атындағы Қазақ мемлекеттік ұлттық университетінің кафедра меңгерушісі Майя Шығаева «Парасат» орденіне ие болыпты.
Осындай құрметке республикамыздың басқа да көптеген азаматтары бөленген.
Бетті әзірлеген Сұңғат ӘЛІПБАЙ.