Бағдарламалар • 23 Сәуір, 2018

Жолдауды іске асырудың ілкімді жолы

31 реткөрсетілді

Мемлекет басшысының Қазақстан халқына арнаған бес әлеуметтік бастамасы атап көрсетілген Үндеу қазақстан­дықтарды бір серпілтіп тастаған болатын. Елбасының «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында атап көрсетілген міндеттерді орындауда бұл Үндеудің алатын орны ерекше деп ойлаймын.

Себебі осы Жолдауда атап көр­сетілгендей, тәуелсіз Қазақ­стан­ның басты байлығы адам капиталы екені рас. Яғни, Жол­дауда белгіленген ел эко­номи­касы дамуының 10 стра­тегия­лық міндетін жүзеге асыра­тын Қазақстан азаматтары екен­дігін ескерсек, республика тұр­ғын­дарының әлеуметтік мәсе­ле­лерін шешуді жеңілдетуге бағыт­талған бұл Үндеудің ма­ңызы еселеп арта түсері анық.

Сондай-ақ Үндеуде «Жұмыс істейтін әрбір адам несиеге пәтер сатып алып, оны отбасылық бюд­жетінің мүмкіндіктері аясында төлей алатындай болуы үшін арзан ресурстар ұсынатын тетіктер қажет. Сондықтан мен «7 – 20 – 25» бағдарламасын ұсынамын. Жұмыс істейтін әрбір қазақ­стан­­­дық төмендегідей шарттар бо­­­йынша теңгемен несие алу мүм­­кіндігіне ие болады. Несие өсімінің мөлшерлемесі қазіргі­дей 14-16 емес, жылына 7 па­йыз­­дан аспайтын болады», деп нақ­­ты­лануын балаларымыз үшін, болашақ ұрпақ үшін жаса­лып жатқан үлкен әкелік қамқ­ор­лық, теңдессіз тарту деп түсін­ген абзал. Төменгі пайызбен бері­летін ипотекалық тұрғын үйлер ел жастарының баспана мәсе­лесін біржола шешуге бағыт­тал­ған маңызды бетбұрыс деп есептеймін.

Үндеудегі «Салыстырмалы түр­де жалақысы төмен қазақстан­дықтарды қолдау үшін 2019 жылдың 1 қаңтарынан бастап олардың салық жүктемесін 10 есеге азайтып, 1 пайыз ғана салық салуды ұсынамын. Ай сайын ең төменгі есептік көрсеткіштің 25 еселен­ген көлемінен аз жалақы ала­тын­дарға салынатын жеке та­быс са­лығын азайту арқылы олар­­дың салық жүктемесін же­ңіл­де­ту керек. Ал осылайша салық­ты азайтудан шығатын қар­жы олардың жалақысын көбей­туге жұмсалуы қажет», деген жол­дар тұрмысы төмен отба­сы­лардың жағ­дайын жақсартуға, әлеу­мет­тік тең­сіздікті азайтуға, тұр­ғын­дар­дың әл-ауқатын көтеруге ба­ғыт­тал­ған оң шешім. Меніңше, дер кезінде қа­был­­данған осы бағ­дар­лама қазақстан­дық­тард­ың тұр­мы­сын жақ­сар­тумен бірге, елдегі кей­бір әлеу­меттік топтардың ара­сын­­да орын алып жатқан теріс түсі­нік­­те­рдің алдын алуға септе­се­­тіндігі анық.

Ең бастысы, студенттерге ар­нап 75 мың орындық жатақха­налар салу туралы бастама бұқара халық пен жастарымыздың үлкен риза­шылық сезімін туғызды. Үн­деуде айтылған ұсыныстар жас­тардың еліміздің және шетел­дердің ЖОО-да толыққанды және тегін білім алуына жаңа көк­­жиек­тер ашып отыр деп түсінемін.

Бүгінде Қазақстан халқының едәуір бөлігі орта және шағын кәсіппен айналысуда. Нарық заңдылығы да осыны талап етеді. Әлемдік экономикалық дағдарыс жағдайында тұрғындардың өзін-өзі еңбекпен қамтуы үшін бұл да аса маңызды мәселе. Осы орайда Мемлекет басшысының «2018 жылы қосымша 20 миллиард теңге бөліп, шағын несиелердің жалпы сомасын 62 миллиард теңгеге жеткізуді тапсырамын»,  деген бастамасын дер кезінде көтерілген өте бағалы шешім ретін­де бағалаймын.

Үндеудегі «Біз Қараөзек (Қызылорда облысы) – Жезқазған – Қарағанды –Теміртау – Астана бағытында магистральды газ құбырын салу жобасын жүзеге асыруымыз керек», – деген жолдарды оқығанда кеудемізді мақтаныш кернеді. Осы орайда біз, қызылордалықтар еліміздің жүрегі – Астанаға көптен бері жетпей тұрған көгілдір отынның Қызылорда облысының территориясынан тартылатындығына шын жүректен қуанғанымызды жеткізгіміз келеді. Міне, Прези­денттің бастамасымен «Сыр – Алаштың анасы» деген сөз шын­дыққа айналды.

Серікбай ҚОСАН,

Қызылорда облыстық «Рухани жаңғыру» орталығының бөлім меңгерушісі

Баннер
Соңғы жаңалықтар

Ұқсас жаңалықтар