Нью-Йоркте өткен бұл жиын барысында еліміздің БҰҰ жанындағы Тұрақты өкілі Қайрат Омаров ұйымға мүше елдер Қазақстан Президенті Нұрсұлтан Назарбаевтың осы саммитті өткізу туралы бастамасын қолдай отырып, исламмен ниеттес екенін көрсеткенін атап өтті. Сондай-ақ ол аталған саммиттің ЭКСПО-2017 халықаралық көрмесін өткізу мерзіміне орайластырылғанын еске салды. Онда мұсылман елдерінің өкілдері энергетика саласындағы ең жаңа ғылыми-техникалық жетістіктермен танысуға мүмкіндік алды.
Қ.Омаровтың айтуынша, Қазақстан әлемдік экономикадағы ислам әлемінің бәсекеге қабілеттілігін біздің табыстарымыз және болашағы зор жетістіктеріміз анықтайтынына сенімді. Бұған қоса, ол мұсылман елдерін исламның асыл құндылықтарын насихаттау және бүкіл әлемде инновациялық идеяларды енгізу үшін жауапкершілікті өзіне алатын интеллектуалды элитаның жаңа ұрпағын тәрбиелеуге шақырды. Сонымен қатар саммиттің табысы атап өтілді.
Қорытындылай келе, Қ.Омаров ғылым мен технологиялар дамудың қазіргі заманғы проблемаларын, соның ішінде кедейлікпен күрес, денсаулықты, қоршаған ортаны қорғау, азық-түлікпен, сумен қамтамасыз ету және энергетикалық қауіпсіздік мәселелерін шешуде негізгі рөл атқаратынын еске салды.
Сөз сөйлеген ИЫҰ-ға қатысушы елдердің тұрақты өкілдері осы тақырыптың барлық мұсылман қауымы үшін өзекті екенін атап өтті. Ауғанстан елшісі Махмуд Сайкал Қазақстанның Тұрақты өкілдігіне мақсаты жалпы даму үшін оң негізде ақыл-ойды біріктіру болып табылатын осы маңызды және уақтылы диалогты ұйымдастырғаны үшін алғысын білдірді. Өзбекстан елшісі Бахтиор Ибрагимов Қазақстанның ғылым және технологиялар жөніндегі бірінші саммитті шақыруда көрсеткен көшбасшылығын атай отырып, қатысушыларға 2020 жылы екінші саммитті өткізетін Ташкент осы эстафетаны Астанадан алғаны туралы хабарлады.
Гайананың елшісі Рудольф Тен-Поу бірінші саммиттің шешімдерін іс жүзінде жүзеге асыру ислам әлеміндегі ғылым мен технологияларды дамыту үшін өте маңызды екенін жеткізді. Оның айтуынша, елдердің әртүрлі салалардағы артықшылықтарының синергиясы шынайы прогреске қол жеткізуге мүмкіндік береді.
Мысырдың өкілі ИЫҰ-ның іс-қимыл бағдарламасы мен БҰҰ-ның 2030 жылға дейінгі даму күн тәртібін прогресс пен ниеттестілікке бағытталғанын атай отырып, оларды салыстырды.
Іс-шараға қатысқан Ирак, Қатар, Ливан, Палестина, Қырғызстан, Тунис мемлекеттерінің елшілері, сондай-ақ Біріккен Араб Әмірліктерінің, Уганда, Джибути, Иордания, Түркия, Түрікменстан және ИЫҰ-ның өзге де елдерінің өкілдері Қазақстанның саммитті шақыру туралы бастамасын жоғары бағалап, ғылыми және технологиялық даму тақырыбы жаһандық ақпараттық прогрестің қазіргі жағдайында өте маңызды екенін атап өтті.
Дайындаған
Жолдыбай БАЗАР,
«Егемен Қазақстан»
