Хоккей • 26 Сәуір, 2018

Қазақстан хоккейден Ұлыбритания құрамасын ойсырата жеңді

148 реткөрсетілді

Хоккейден Қазақстан ұлттық құрамасы әлем біріншілігінің жоғары дивизионына оралу үшін тағы бір батыл қа­дам жасады. Венгрия ас­танасы Будапешт қала­сында өтіп жатқан әлем чемпионатының екінші матчында отандас­тары­мыз Ұлыбритания құра­ма­сымен кездесіп, 6:1 есе­бімен ойсырата жеңді.

Екі құрама арасындағы текетірестің бірінші кезеңі 1:1 есебімен тең аяқталды. Матчтың үшінші минутында Ұлыбритания құрамасының ойыншысы Люк Феррар есепті ашып, командасын алға шығарса, 15-минутта қазақстандық хоккейші Дмитрий Гренц таразы басын теңестірді.

Ойынның екінші кезеңін Қазақстан құрамасы нәтижелі бастап, басымдықты өз қолдарына алды. Матчтың 33-минутында Антон Сагадеев шайбаны алыстан бағыттап, қақпаны дәл көздеген болатын. Алайда Ұлыбритания құрамасының бапкері соғылған шайбаға өзінің наразы екенін, ережеге сай соғылмағанын айтып, төрешілерден сол сәтті видео­дан қайталауын көруді талап етті. Нәтижесінде, төре­шілер шайба соғылған кезді қай­та қарап, Сагадеевтің шайбасын есепке алды. Арада екі минут өткен соң Роман Старченко есепті 3:1-ге жеткізді.

Үшінші кезеңде Қазақстан құрамасы британиялықтардың қақпасына жауапсыз үш шайба соқты. 42-минутта Роман Старченко дубль жасаса, 46-минутта Никита Михайлис мергендігімен көзге түсті. Ал алтыншы шайбаны құрамамыздың жас ойыншысы Әлихан Әсетов соқты. Қорытынды есеп – 6:1.

Екі ойында да жеңіске жеткен Қазақстан құрамасы алты ұпай жинап, І дивизионының «А» тобында бірінші орында келеді. Екі матчта үш ұпай жинаған Италия, Польша, Венгрия және Ұлыбритания құрамалары екінші мен бесінші орындарды өзара бөлісіп тұр. Ал мүлде ұпайы жоқ Словения хоккейшілері соңғы алтыншы орында.

Айта кетейік, чемпионат қоры­тындысы бойынша бірінші және екінші орынға қол жеткіз­ген құрамалар «А» тобының жо­ға­ры дивизионына, яғни ТОП диви­зионда ойнауға мүмкіндік алады.

Ұлыбританияға қар­сы ойна­ған Қазақстан құра­ма­сының ойыншылар тізімі: Карлссон – Семёнов-Далл­мэн, Старченко-Кучин-Рыма­рев; Лакиза-Метальников, Ми­хай­лис-Гренц-Евдокимов; Полохов-Орехов, Акользин-Сагадеев-Мар­келов; Ыбырайбеков-Петухов, Әсетов-Гурков-Вол­ков.

Бет қатталып жатқанда: Кеше кешкісін Қазақстан құ­рамасы италиялық хоккей­ші­лермен кездесіп, 0:3 есебімен ұтылып қалды. Ойын туралы толығырақ ертеңгі нөмірде жарияланады.

Әли БИТӨРЕ,

«Егемен Қазақстан»

Баннер
Соңғы жаңалықтар

Қырғыз әуені

Руханият • Кеше

Хат қоржын (15.07.2019)

Руханият • Кеше

Ұқсас жаңалықтар