Шараға «Қазақстан» телерадиокорпорациясының стратегиялық маркетинг департаментінің жетекшісі Жаннұр Айдарбекова мен қосымшаны жүзеге асырған компания басшысы Абай Серғазиев қатысты.
Бұл қосымша арқылы көрермендер корпорация құрамына кіретін «Qazaqstan», «Balapan» және «Qazsport» телеарналарының телеөнімдерін жоғары сапада тікелей эфирде көру мүмкіндігіне ие болмақ. Яғни кез келген жерде кез келген уақытта қалаған бағдарламаны тікелей эфирдің браузеры арқылы кіріп тамашалауға болады.
Стратегиялық маркетинг департаментінің жетекшісі Ж.Айдарбекованың айтуынша, цифрландыру – бұл уақыт және заман талабы. «Елбасымыз өз Жолдауында ақпараттық-технологиялық шешімдерді енгізу қажеттігін айтқан болатын. Біздің корпорация да осы тың бастамадан тыс қалмауды көздеп отыр. Бұл қосымша арқылы әрбір қазақстандық сүйікті бағдарламасын сақтау функциясы арқылы жүктеп алып, өзіне ыңғайлы уақытта көре алады. Сондай-ақ бұл қосымшада бірқатар функциялар бар», дейді ол.
«Qazaqstan TV» қосымшасының ерекшеліктеріне тоқтала кетер болсақ, жоғары сапалы тікелей эфирдің қолжетімділігі, бағдарламаларды сақтау мүмкіндігі, бағдарламаны ыңғайлы уақытта көру мүмкіндігі, жаңалықтарды дыбыстық тыңдау сияқты көптеген функциялардан тұрады.
Енді «Qazaqstan TV» қосымшасының көрермендері я тыңдармандары телерадиокорпорация құрамына кіретін «Qazaqstan», «Вalapan» және «Qazsport» телеарналарымен қатар, «Қазақ радиосы», «Шалқар радиосы», «Астана» және «Классик» радиоларын еліміздің әр бұрышында тыңдай алатын мүмкіндікке ие болмақ. «Qazaqstan TV» қосымшасын AppStore және Play Market арқылы жүктеп алуға болады.
А.Серғазиев қосымшаны небәрі бір жарым айда жасап шыққанын айтты. Қосымшаның тағы бір ерекшелігі, оны пайдаланушы есту, көру қабілеттері төмен жандар үшін арнайы тетіктер қарастырылған.
Мирас АСАН,
«Егемен Қазақстан»
