Жасы тоқсан төртке келген Бисұлтан қарияның айтары көп. Майдан даласына небәрі 17 жасында – 1943 жылы аттанған ол, Сталинградты қорғаудан бастап, бірнеше отты майданның тажал шебінен аман өтті. Жеңіс туы желбіреген тарихи сәтті Берлинде тойлаған азғантай қазақтың бірі де осы кісі. Ұзақ жылдар бойы республикалық газеттің тілшісі, бөлім меңгерушісі қызметтерін абыроймен атқарды. Кешегі кеңес дәуірінде Бүкілодақтық аса маңызды шаралар кезінде Мәскеуден, Съездер сарайынан газет редакциясына жолдаған жедел репортаждары мен есеп-аудармалары «Егеменнің» тарихи қоржынында қатталып тұр. Жасы ұлғайғаны болмаса көңіл көкжиегі кең қайсар жауынгер, көргені мен түйгенін шежіре қылып шертеді. Қапыда қан жұтқан майдан даласындағы қаруластарын тебірене еске алады. Жалындаған жастығын соғысқа берген бозбаланың арман-аңсарын әңгімеге арқау етеді. «Көпшілігінің артында әулет көшін жалғайтын із де қалмады» деп күрсінеді бір уақыт. Ардагердің осы бір сөзі алапат соғыс қай шаңыраққа болса да оңай соқпағанын аңғартса керек. Расында да, түтінін де түтетіп үлгере алмай, қапыда қыршын кеткен боздақтар рухының алдында бәріміздің мәңгілік борыштар екенімізді есімізге салады.
Сұрапыл соғыста бірнеше ауыр жарақат алса да елге аман оралған Б.Аманғалиев ақпарат саласында еңбек ете жүріп, журналистік жолда талай тағдырға араша болды. Бар қажыр-қайратын, білім-білігін қазақ журналистикасына арнады. Сол кездегі ел басқарған азаматтармен етене араласып, ел тағдырына қатысты өзекті мәселелерді қаламынан тыс қалдырған жоқ. Көңілдің кейбір сәттерінде ми қабығын кемірген сан алуан ойларды әлі де қағаз бетіне түсіріп, өшпес күндерді тебірене еске алады. Кейінгі ұрпаққа ұлағатын айтады.
«Жаяу әскер, танкі әскері, әуе күштерінде шайқастым. Шайқастың небір ғаламаттарын көрдім. Тіпті бес айдай госпитальда жатып емделгенім бар. Оның төрт айында есімнен бір айырылып, бір жиып әйтеуір аман қалдым-ау! Нақтырақ айтсам, бір өліп, бір тірілген адаммын. Көрер жарығымыз бар екен. Майдандас бауырларымның барлығы да елі үшін жан аямай күресті. Олардың барлығы да зор құрметке лайық жандар. Бейбітшілік пен берекенің қадірін біліңдер. Одан асқан бақыт жоқ. Үлкенге құрмет, кішіге ізет көрсету қанымыздан келе жатқан қасиет. Ең бастысы, осы қасиетті жоғалтып алмаңдар. Тәуелсіздігіміз мәңгілік, ел іргесі берік болсын. Келешек ұрпағымның алдынан енді ешқандай кедергі кездеспесін. Тек қана мамыражай бейбіт заман болып, соғыс өрті тұтанбасын. Адамды адам қылатын, адамгершілік пен адал еңбек қана», дейді көпті көрген қазыналы қария.
Өмірлік жолдасы Шахарбану Шахметқызымен бірге сегіз перзентті тәрбиелеген тәлімді әке бүгінгі күні ұлы Ғалидың қолында. Қамкөңіл жанның қас-қабағына қарап отырған перзенті әке арманын жалғап, жалынды жауынгердің ерен ерлігін болашақ ұрпағына жеткізуді өмірлік борышы санайды. Ел газеті «Егемен» алматылық ардагерді ешуақытта ұмытқан емес. Ұлы Жеңіс мерекесінде барша оқырмандар атынан ардагер қаламдасымызға амандық-саулық тілейміз.
Арман ОКТЯБРЬ,
«Егемен Қазақстан»
АЛМАТЫ
