Өткен жылы аталған байқауда «Дәстүрлі ән» аталымы бойынша жамбылдық Сұлужан Әбенова топ жарған болатын. Жуырда өңірлік коммуникациялар қызметі алаңында өткен баспасөз мәслихатында «Qazaqstan» РТРК» акционерлік қоғамы «Jambyl.tv» Жамбыл облыстық филиалының директоры Жасұлан Әбдіманап аталған жобада Әулиеата өңіріндегі таланттардың көрінуіне мүмкіндік жоғары екенін, сонымен қатар, жобаның мақсаты ауылды жерде жүрген азаматтарға қолдау көрсету екенін айтты.
Ал Жамбыл облыстық мәдениет, архивтер және құжаттама басқармасы басшысының орынбасары Зүбәйра Сембинаның айтуынша, үш аталым бойынша Тараз қаласында және облыстың барлық аудандарында іріктеу кезеңдері өтіп, оны білікті мамандар саралайтын болады. Сондай-ақ аталған байқауға 18 бен 40 жас аралығындағы дәстүрлі өнерге бейімі бар үміткерлер қатыса алады. Жалпы, басқосуда қатысушылардың арнайы дипломы немесе кәсіби білімі болуы маңызды еместігі де айтылды. Өз сөзінде облыстық Халық шығармашылығы орталығының көркемдік жетекшісі Эльмира Дүтбаева айтулы мегажобаға Әулиеата өңірінің дайындығының жоғары екеніне және байқауға қатысушы өнерпаздардың сапалық құрамы жақсарғанына тоқталды.
«Ел іші – өнер кеніші» дейді халқымыз. Ендігі жерде аталған жоба арқылы ауылда жүрген талантты өнерпаздар да тыңдарманымен қауышып, шығармашылығын дамыта алады. «Men qazaqpyn» жобасында «Дәстүрлі ән» аталымы бойынша танымал әнші Айгүл Мақашева, «Терме өнері» аталымы бойынша термеші-жыршы Ертай Тазабеков, «Күй» аталымы бойынша күйші Ержан Рысметов үміткерлердің әділ бағаларын беріп, барлық аудандарды аралап шығады деп жоспарлануда.
Хамит Есаман,
«Егемен Қазақстан»
Жамбыл облысы
