Бурабай ауданының әкімі Қанат Қарауыловтың аталған жиында келтірген мәліметіне қарағанда, жыл сайын туризм инфрақұрылымы қарқынды дамып келеді. Ағымдағы жылдың басында 70 орындық «Архей» шипажай кешені пайдалануға берілген. Бұдан басқа, курортты аймақта 100 орындық мейманхана кешені, ойын-сауық және сауда орталығы, қонақ үйлер, тұрмыстық-мәдени және көңіл көтеру қызметтерін көрсету нысандары салынуда. Сондай-ақ 14 гектар жерді қамтитын променад аймағы мен қонақ үйлері, спорттық-сауықтыру, сауда-көңіл көтеру, әлеуметтік-мәдени нысандарды қамтыған көпфункционалды кешен құрылысы басталады деп күтілуде. Өз кезегінде «Бурабай даму» ЖШС біртұтас байланыс орталығының басшысы Азамат Баймұқанов қонақ үйлер кешендерінің, мейманханалардың, туристік агенттіктер мен экскурсиялық бюролардың өзара жұмыс істеуі барысын ортаға салды.
Белгілі болғандай, «Әлем» отельдер желісі өз клиенттеріне құрамында тегін экскурсиясы мен жаяу жүру, «Жайлау» этноауылын тамашалау, «Burabay Land» көңіл көтеру паркіне апару, сондай-ақ көңіл көтеруге 50 пайыздық жеңілдік беретін дисконттық карталарды: квадроциклмен және атпен серуендеу, 5D кинотеатрын тамашалау, табиғат мұражайын көру, садақ ату және өзге де қызметтерді қамтыған туристік пакет ұсынады екен. Ал «Есіл» ӘКК» ҰК» басшысы Қазбек Ескендіров жиынға қатысушыларға Бурабайда ағаштан бір стильде қиып жасалған 30-ға тарта сауда павильондарының салынатындығын жеткізді. Мұндай механизм курорттық аймақтың сәнін ғана келтіріп қоймай, сауда-саттықты да жүйелей түсетіні көлденең тартылды. Бұл өз кезегінде туристерді сапалы өнімдермен қамтамасыз етуге, кәсіпкерлердің сенімін арттыруға мүмкіндік береді.
Жиынға қатысқан облыс әкімі Мәлік Мырзалин туристік инфрақұрылым нысандарының дайындығын қамтамасыз етуді және туристерді қабылдауды жолға қою керектігіне ерекше назар аудартты. Шомылу барысында қауіпсіздікті қамтамасыз ету, қоғамдық әжетханаларды ретке келтіру, ақпараттық анықтамаларды орналастыру сияқты жұмыстарды атқаруға тапсырмалар берілді. Реті келгенде айта кету керек, марал шаруашылығына жақын жерде орналасқан «Жайлау» этноауылында қонақтарға арнап қазақ халқының дәстүрін көрсететін болады. Жазғы кезеңнің басталуымен ұлттық ойындарға қатысты әртүрлі шаралар ұйымдастырылады деп күтілуде. Сонымен қатар атпен және жаяу жүріп Бурабай ауданындағы қасиетті орындарды аралату да жоспарланған. Және бұдан басқа да көптеген іс-шаралар келушілерді кеңінен тарту үшін жасалатынын айта кету керек.
Асқар ТҰРАПБАЙҰЛЫ,
«Егемен Қазақстан»
Ақмола облысы
