«Сын түзелмей, мін түзелмейді» дейді халқымыз. Кемшілікті көрсетіп, оның жойылуына атсалысу да азаматтық парыз. Жуырда ғана Тараз қаласының әкімі болып тағайындалған Ғалымжан Әбдірайымов шаһар көшелерін аралап, бірқатар кемшіліктерді өткір сынады. Мәселен, қала көшелерінің сәнін кетіріп тұрған жабайы жарнамалар жайын айтқан әкім тиісті мекеме басшыларына аталған кемшілікті жою жөнінде тапсырмалар берді.
Қала көшелерін аралау барысында әкім Абай даңғылының бойында орналасқан Жамбыл Жабаев атындағы №5 мектеп-гимназияның маңындағы жасанды жол кедергісінің жартысы жоқ екенін де сынады. Сонымен қатар жол бойындағы тал-дарақтардың біркелкі әктелуі, су құбыры жүйелерінің қақпағы мен жол белгілерінің орнатылуы да назарға алынды.
Қаланың Абай және Фурманов көшелерінің қиылысында канал бар. Ал осы каналдың бойына әсіресе жаз мезгілінде қоқыс толып қалады. Әрі-бері өткен тұрғындардың қалдықтарды осында лақтырып кете беретіні де жасырын емес. Әкімнің айтуынша, ендігі жерде аталған канал бойына тазарту жұмыстарын жүргізу үнемі қадағалауда болады.
Тараз қаласындағы ең ірі сауда нысандарының бірінен саналатын «Ауыл-Береке» базарына баратын жолдың да бұл күнде тозығы жеткен. Сондай-ақ тар жолмен жүрудің өзі қиын. Әрине, бұл мәселе де қала халқын алаңдатпай қоймайды. Егер қала әкімінің тиісті мекемелерге берген тапсырмасы жүзеге асатын болса, базарға апаратын ескі жолдың жаңаланатын күні алыс емес. Енді тиісті кәсіпкерлік құрылымдар қала жолдарының маңызды бөлігі саналатын жолды жөндеуге құлық танытса болғаны.
Тағы бір айта кететін мәселе, бүгінгі таңда Тараз қаласында іргетасы қаланған 14-шағын ауданды ыстық сумен қамтамасыз ететін су-құбыр жүйелері негізінен аталған «Ауыл-Береке» базарының маңынан өтеді. Бірақ қомақты қаражат кеткен әлгі құбыр желісі дұрыс орнатылмаған. Сонымен қатар базар маңындағы су қоймасына қоқыс тастаушылар саны да артуда. Базардағы сауда орындарынан, ондағы асханалардан күн сайын қыруар қоқыс шығады. Енді су қоймасына тасталған сол қоқыстардан соң аталған қойманың жайын елестетудің өзі қиын. Сондықтан да бұл мәселенің бір айдың ішінде шешілетінін айтты Ғ.Әбдірайымов.
«Әкім бол, халқыңа жақын бол» дейді халық. Көне шаһарда көкейкесті мәселе әрине көп. Енді сол мәселенің бәрі де ретімен шешімін тапса, шаһардың сәулеті бүгінгіден де артып, Тараздың тотыдай таранып, тұғырынан таймайтыны анық.
Хамит ЕСАМАН,
«Егемен Қазақстан»
Жамбыл облысы
