Форумның ұйымдастырушылары Алматы қаласы әкімі аппаратының «Қоғамдық келісім» КММ және Алматы қаласы этномәдени бірлестіктер жанындағы жастар қанаты болып табылады.
Форумда Елбасының «Болашаққа бағдар: рухани жаңғару» бағдарламалық мақаласы аясында цифрлы журналистиканың мүмкіндіктері талқыланды. Форумды ашқан Қазақстан ұйғыр жастар одағының төрағасы, ҚХА мүшесі Р.А.Кайрыев жаңа технологиялар кезеңінің мүмкіндіктері тұрғысында бірқатар мысалдарды ортаға салды. Алматы қаласы ҚХА төрағасының орынбасары К.Мамсуров еліміздің цифрлы жүйеге көшудегі жобаларында жастарға үлкен жауапкершілік жүктелетінін айта келе, алдыңғы буын жаңа технологиялардың жетістіктерін жастардан үйренеді деген пікірін білдірді.
Ал әл-Фараби атындағы ҚазҰУ ЮНЕСКО, халықаралық журналистика және қоғамдық медиа кафедрасының меңгерушісі, профессор Н.Шыңғысова журналистиканың қоғамды сауықтырудағы, еліміздің беделін көтерудегі рөлінің жоғары екендігін бүгінгі таңда қауіпті мамандықтар қатарына енгендігін айта келе ақпараттық қауіпсіздік, журналистің құқығы, цифрлы форматқа көшудегі жаңа мүмкіндіктер туралы ойын ортаға салды.
Ал Достық үйінің директоры Ж.Шаймұханбетова ҚХА жастар белсенділігі турасында сөз қозғап, «Жарасым жолы» жастар қозғалысының жұмысына тоқталып, цифрлы жүйеге көшудегі жастардың бастамаларына сәт-сапар тіледі.
Алматы қаласы бойынша «Жаңғыру жолы» жастар қозғалысының төрағасы, саясаткер И.Кураев «Мемлекетті цифрландыру: мүмкіндіктері мен болашағы» тақырыбында баяндама жасап, қазақстандық жастар жаңа заманның үйлестірушісі деп атап көрсетті. Яғни цифрлы жүйеге көшуде еліміздің алыс аймақтары мен орталықтарын байланыстырудағы негізгі көпір болып табылатын жастар қауымы жылдам, зерек, қағілездік басымдықтарына ие болу арқылы еліміздің осы бағыттағы үдерістерінің белсенді қатысушылары болып табылатындығын жеткізді.
ҚКХП ұйымдастыру партия секторының меңгерушісі А.Әуелбеков «Қазақстан Республикасындағы цифрлы технологиялардың дамуы» тақырыбындағы баяндамасында электронды үкіметтің мүмкіндіктері, цифрлы жүйедегі жаңашылдықтар туралы деректер келтірді.
Алматы қаласы әкімі аппаратының «Қоғамдық келісім» КММ директоры Ж.Мұрынова «Жаңғыру жолы», «Жарасым» жастар қозғалысының кез келген жобаларына қолдау білдіретіндігін айтып, жастардың жауапкершілігі жоғары деп атап көрсетті.
Форум аясында Р.Кайрыев жас журналистерге арналған «Zharasym magazine» жаңа электронды журналды таныстырды. Ұйымдастырушылардың пікірінше, жаңа журналдың мүмкіндіктері зор. Қазақ тілін меңгеруде де, латын қарпін игеруде де дәнекер басылым болып табылады.
Эльвира СЕРІКҚЫЗЫ,
«Егемен Қазақстан»
АЛМАТЫ
