«Ұрпақтар сабақтастығы» аталымында Мамлют ауданынан келген Шәукеровтер жеңімпаз атанды. Уәлиханов ауданының намысын қорғаған Қасымбековтер ибалы тоғыз бала тәрбиелеп, 17 немере, 2 шөберенің қызығын көріп отыр. «Ұстаз болу – жүрек қалауы» аталымы бойынша жеңістің ең биік тұғырына көтерілген Дүйсенбиндердің педагогикалық жұмыс өтілі 200 жылға таяу. Ата-ананың жолын қуған ұл-қыздары Новоишимка мектебінде еңбек етеді. Осылайша алты аталым сарапқа салынып, жүлделі орындар өз иелерін тапты.
Жалпы, байқаудың қорытындысында екінші орынға ие болған Щеголевтер туған ауылына былтыр 18 миллион, биыл 6 миллион теңгенің қаржылық қолдауын жасапты. Олармен тең өнер көрсеткен Мұхамедияровтарды бастап келген отағасы Болат пен отанасы Мафруза алты ұлын ұяға қондырған. Бәрі де шетінен өнерпаз. Ұлдарының бірі халықаралық «Шабыт» байқауының лауреаты. Бүгінде Көкшетаудағы Біржан сал атындағы өнер колледжіне жетекшілік етеді.
Бірінші орынды Эктовтар мен Исақовтар әулеті бөлісті. Петропавлдық Эктовтардың спорт саласындағы табыстары ауыз толтырып айтарлықтай. Александр 1998 жылдан бері жеңіл атлетикадан аға жаттықтырушы болып істейді. Осы аралықта 4 халықаралық дәрежедегі спорт шеберін, 8 спорт шеберін дайындап шығарған. Әйелі Нина да жаттықтырушы. Ұлдары әлемдік жарыстарда олжа салып жүр.
Исақовтар 2004 жылы Өзбек- станнан Жамбыл ауданына қоныс аударып, содан бері үлгілі отбасы ретінде ауылдастарының құрмет-қошеметіне бөленген. Сапархан қазақ тілі пәнінің мұғалімі болса, Сайра шағын орталықта тәрбиеші. Әулет жетімдер үйінен асырап алған Артем, Катя, Григорий, Мария деген жеткіншектермен толығыпты. Оларды өзіміздің кіндігімізден өрбіген төрт баладан кем көрмейміз. Үйде қазақ тілінде сөйлесеміз, дейді Сайра.
Өмір ЕСҚАЛИ,
«Егемен Қазақстан»
Солтүстік Қазақстан облысы
