Соның ең сорақысы, қоғамдық көліктерде өзін «Оңай!» бақылаушыларымыз» деп таныстырып, жолаушылардың картасынан ақша шешіп алатын жалған бақылаушылар пайда болды деген ақпараттың қаулауы деуге болады. Осыған қатысты жауапты мамандар не дейді?
Әлеуметтік желілерді аша қалсаңыз, мұндай ақпараттарды көптеп кездестіресіз. Мәселен, Алматы қаласының тұрғыны Мақсат Дүйсенов өзінің «Оңай» картасындағы ақшасының бір емес, бірнеше мәрте кеміп қалғанын айтады. «Күн сайын қоғамдық көлік қызметін қолданамын. Көп көлемдегі қаражат болмаған соң теңгерімімдегі ақшам азайып қалғанына басында аса мән бермеген болатынмын. Кейін жақын досымнан «төлем тексерушілерміз деп жолаушыларды алдап ақша жасайтын алаяқтар шығыпты» дегенді естігенде ойланып қалдым. Содан бастап бақылаушыларға картамды ұсынғанда сақ қарайтын болдым» дейді ол.
Өздерін «Оңай!» картасының бақылаушылары деп таныстыратын бейтаныс адамдардың көбейіп кетуіне байланысты жауапты мамандар қоғамдық көлік қызметін қолданатын алматылықтарға сақ жүріп, мұқият болуға кеңес береді.
– Азаматтар бақылаушылардың жол ақысының төлемін тексеру үшін картаны жолаушылардан сұрап алып, оларды мобильді терминал арқылы өткізіп, сол арқылы картадан қаражатты қайта шешіп алып жататынын айтып, жиі шағым түсіреді. Мұндай жағдайда жолаушы Алматы көлік холдингіне өтініш жазуына болады. Осылайша, қайталанып алынған сома картаның теңгеріміне қайтарылады. Осындай келеңсіз жағдайлар қайталанбас үшін картаны қоғамдық көлік кондукторларына бермеуге кеңес береміз. Өйткені олар АХК-нің де, тасымалдаушы-компанияның да ресми түрдегі қызметкерлері емес. Картаны тек арнайы форма киген, бейджі және жеке куәлік пен бақылаушының өкілеті бар, ресми түрде жұмыс атқаратын бақылаушыларға тексеру үшін беру қажет. Егер қоғамдық көліктен жалған бақылаушыны байқаған болсаңыз, тез арада «Оңай!» байланыс орталығына хабар беруіңізді сұраймыз, – дейді Алматы көлік холдингінің директоры Садир Хамраев.
Әзірге еш жерде мұндай құқық бұзушылық фактісі ресми түрде тіркелмеген. Алайда жоғарыда келтіргеніміздей, бұл мәселеге қатысты дабыл қаққан жолаушылар жоқ емес. Қалай болғанда да, әңгіме бекер айтылмаса керек. «Оңай» оңай демеңіз, абай болыңыз!
Арман ОКТЯБРЬ,
«Егемен Қазақстан»
АЛМАТЫ
