Елордада экологиялық жәрмеңке өтті

Жоба аясында осы жылдың шілде айынан бастап қаладағы 2070 қоқыс алаңдарына арнайы 6 275 контейнер қойылады. Осы­лайша, шаһар тұрғындары «сары» және «жасыл» түсті кон­тейнерлерге тұрмыстық қал­дықтарды сұрыптап тастайды. Айталық «сары» контейнерге қайта өңдеуге жарамды: металл, пластик, қағаз, шыны қалдықтары тасталса, жасыл контейнерге тамақ қалдықтары, органикалық және басқа да өңдеуге келмейтін қалдықтар салынбақ. Қоғамдық маңызы бар бастамаларды дамыту қоры төрағасының орынбасары Татьяна Немцанның айтуынша, үйдегі қоқысты сыртқа көбіне балалар шығаратындықтан, шараны ұйымдастыруда оларды аталған жобамен таныстыру, тазалыққа баулуға баса назар аударылды. Елорда жастары экологиялық мәдениетті насихаттаушы, тазалық қозғалы­сының бастаушысы болуы үшін қала мектептеріндегі ұстаз­дарға арналған шеберлік дәріс­тері де өткізілді. Ал Сlean Taxi әлеуметтік жоба­сының жетекшісі Оразгүл Есдәулетованың айтуынша, алдағы уақытта елорда тұр­ғындары істен шыққан тұр­мыстық техниканы, ескі телефон мен компьютерді жаңа так­си қызметіне өткізу арқылы уақыты мен ақшасын үнемдей алады. Тегін такси тозығы жеткен техникаларды өңдеу орындарына жеткізеді. Бұған қоса, тұрмыстық қалдықтарды өткі­зуден түскен пайда, әлеу­меттік әлсіз топтарға жаңа жұмыс орнын ашуға мүмкіндік бермек. Барлық жиналған қалдықтар әлеуметтік әлсіз топтардың көмегімен өңделеді. Пилоттық жоба әзірше Астана қаласында қолға алынды. Егер жоба сәтті жүзеге асса, бұл жұмысты Қа­зақстанның ірі қалаларында да жүргіземіз, дейді Сlean Taxi әлеуметтік жобасының же­тек­шісі. Айта кетерлігі, эко­ло­гиялық жәрмеңкеде жи­налған тұрмыстық қалдықтарды 10-нан астам қоқыс өңдеуші компания қайта өңдеуден өткізбек.

Жыл сайын Қазақстанда 5,5 миллион тоннадан астам қатты тұрмыстық қалдық жиналса, елордада бір жылда 300 мың тонна қалдық шығарылады. Бұл дегеніміз қаладан күніне 1 мың тоннаға жуық қалдық шығады деген сөз. Осы ретте қалдықты бөлек жинау арқылы қоқыс полигонына түсетін көлемді азайтуға болады. Бұл өз кезегінде табиғи ресурстың үнемделіп, елімізде қайта өңдеу саласының дамуына жол ашпақ. Тіпті келер жылдың күзінде Астанада қалдық өңдейтін кешенді зауыт іске қосылады деген жоспар бар. Аталған кәсіпорын органикалық қоқысты толығымен өңдеп, био­газ және кей тыңайтқыш түр­лерін шығаруға басымдық береді.

Еркежан АЙТҚАЗЫ,
«Егемен Қазақстан»