![Елімізге қоғамдық келісім мен жалпыұлттық бірлік маңызды](/article_photo/1528342020_article_b.jpeg)
Қазақстан халқы Ассамблеясының қолдауымен, Президент жанындағы Мемлекеттік басқару академиясының облыстық филиалының ұйымдастыруымен өтіп жатқан шараға Қарағанды, Павлодар және Шығыс Қазақстан облыстарының мемлекеттік қызметшілері қатысуда. Семинар барысында Елбасының «Төртінші өнеркәсіптік революция жағдайындағы дамудың жаңа мүмкіндіктері» атты Қазақстан халқына Жолдауы, «Рухани жаңғыру» бағдарламасы мен көші-қон саясаты тақырыптары бойынша отандық ғалымдар мен сарапшылар, Қазақстан халқы Ассамблеясының өкілдері баяндама жасап, ойларын ортаға салатын болады.
«Ғұлама ғалым Әбу Насыр әл-Фараби: «Адамға ең бірінші білім емес, тәрбие берілуі керек, тәрбиесіз берілген білім – адамзаттың қас жауы», деп бекерге айтпаса керек. Сол себептен балаға тәрбие мен білім қатар берілуі тиіс. Осыған баса назар аударғанымыз ләзім. Бізге компьютер басты ұрпақ қажет емес. Кейінгі буын мейірімді, ақылды, парасатты болып өссін десек, біз оларға дұрыс үлгі-өнеге көрсете білуіміз керек. Сонда ғана келешекте ел ертеңін ойлайтын білікті мамандар қалыптастыра аламыз», деді Қазақстан халқы Ассамблеясы Хатшылығы меңгерушісінің орынбасары Нәзипа Шанаи семинар-тренингтің ашылуында.
Үш күнге созылатын семинар-тренингте Президент жанындағы Мемлекеттік басқару академиясы Орталық Азия өңіріндегі этносаралық және конфессияаралық қатынастарды зерттеу орталығы жетекшісінің орынбасары Дастан Көшербаев, Орталық сайлау комиссиясының хатшысы Сабила Мұстафина, Ұлттық экономика министрлігінің өкілі Аяулым Сағынбаева, тарих ғылымдарының докторы Жамбыл Артықбаев мемлекеттік қызметкерлерге дәріс оқиды деп жоспарланған.
Азамат ҚАСЫМ,
«Егемен Қазақстан»
ӨСКЕМЕН