Н.Погодин атындағы орыс драма театрында ауыл шаруашылығы қызметкерлері күніне арналған салтанатты жиын өтті. Онда облыс әкімінің бірінші орынбасары Айдарбек Сапаров баяндама жасап, ауыл шаруашылығы саласындағы жетістіктер мен алдағы міндеттерді жан-жақты саралап берді. Қызылжар өңірінің диқандары егіншілік саласында бұрын-соңды болмаған табыстарға жетті. 8,8 миллион тонна астық жинап, ел Тәуелсіздігінің 20 жылдығына тартулады. Мал шаруашылығы да өркендеп келеді. Алқалы басқосуда Қазақстанның Еңбек Ерлері Геннадий Зенченко, Руслан Молдабеков, Ғ.Мүсірепов ауданының әкімі Марат Тасмағамбетов, тағы басқалар сөйлеп, әріптестерін кәсіби мерекемен құттықтады.
«Орақ-2011» науқанының қорытындысы жария етіліп, гектар өнімділігін 28,2 центнерден айналдырған Тимирязев ауданы жеңімпаз деп танылды. Оған «Тайота-Ланд Круизер» жеңіл көлігі табыс етілді. Екінші, үшінші орындарды Қызылжар және Есіл аудандары бөлісті.
Өмір ЕСҚАЛИ,
Солтүстік Қазақстан облысы.