![Ақмола электронды карталарды енгізу бойынша елімізде төртінші орынға шықты](/article_photo/1528774244_article_b.jpeg)
Әрине экономика құрылымында ауыл шаруашылығының өзіндік орны ерекше. Ең маңызды екі міндетті: азық-түлік қауіпсіздігін қамтамасыз ету және өндірісті әртараптандыру мәселелерін шешу үлкен маңызға ие. Осы тұрғыдан келгенде өңірде электронды карталарды енгізу уақыт талабына айналып отыр. Жақсы ауданы ауылшаруашылық бөлімінің бас маманы Еркежан Төлегеннің мәліметіне қарағанда, аудан облыс бойынша электронды карталарды енгізуде 2-орында тұр. Бүгінгі таңда қамтылған көлем 520 мың гектар жерді құраған. Реті келгенде ағымдағы жылдың ақпан айында енгізілген база агрономдық жұмыстарды бақылап, қадағалауға мүмкіндік бергендігін атап кеткен жөн. Мысалы, Minagro.kz сайтында әрбір тіркелген шаруа қожалықтары жеке кабинеттері арқылы еркін кіре алатындай жағдай жасалған. Аталған портал егістіктің карталарын көруге, аумағы мен суреттерін қарауға, облыс бойынша статистикалық көрсеткіштерді салыстыруға және өзге де қажетті ақпараттарды табуға өте ыңғайлы.
Жалпы, Жақсы ауданына жасаған баспасөз туры барысында бірнеше шаруа қожалығын аралап, жұмыстарымен жақын танысудың сәті түсті. Осындағы Новокиевка ауылдық округінде болған кезімізде егіс алқаптарының көктемгі егіс жұмыстарының дайындығына көз жеткіздік. Бүгінгі таңда ауылдық округтің ауылшаруашылық алқабы 36 128 гектарды құраса, соның 27 234 гектары егістік жерлер болып табылады. Міне, осы алқапты игеруде, әсіресе өсімдік шаруашылығын дөңгелетіп жүрген бірнеше ауылшаруашылық кәсіпорындары да жұмыс істеуде. Бұл кәсіпорындар ауылдық округтің өркендеуіне сүбелі үлес қосып келеді. Атап көрсеткендей, бірнеше шаруа қожалығының басын біріктірген «Gold Drine» ЖШС бірлесіп ұтымды әрекет ету қажеттігі жөнінде өзіндік жұмыс өрнегін көрсетіп келеді. Соның ішінде Григорий Дычок басқаратын «Луч» қожалығы да бар. Серіктестік арпа, бидай, зығыр егумен айналысады. Түскен табыстан шаруашылық басшылары өз қызметкерлеріне барынша жағдай жасап, көмектесіп отырады. Бұрын кеңшар директоры болған, комсомол бригадасын да басқарған Сергей Борисенко ауылдық меценаттардың ең белсендісі екен. Ол осындағы арпа-бидай өсірумен айналысып келе жатқан «Мечта» шаруа қожалығын басқарады. Оннан астам адамға жұмыс тауып беріп отырған азамат мектептің құрылыс жұмыстарына көмектесіп, оқушыларға шаңғы сыйлапты. Мерекелік іс-шараларға да үнемі демеушілік жасап келеді.
Өңірдің тыныс-тіршілігімен арнайы танысу үшін келген БАҚ өкілдеріне берген жауабында Новокиевка селолық округінің әкімі Болат Садықов былай деді: «Біздегі қожалықтар елмен бірге алға ұмтылып, дамып келеді. Соңғы уақыттарда ескі техникалармен жұмыс істеу қиындады. Сондықтан қазір бәрі лизингке немесе мемлекеттік бағдарламалар арқылы қажетті техникаларын жаңартуда».
Асқар ТҰРАПБАЙҰЛЫ,
«Егемен Қазақстан»
Ақмола облысы