![Қайырымдылық концерті заңға қайшы ма?](/article_photo/1528775021_article_b.jpeg)
13 жастағы Әмір Ғабдуллин ахондроплазия дертіне шалдыққан. Буын сүйектерінің өсуі тежелгендіктен қатарластарына қарағанда әлдеқайда әлжуаз. Қол-аяқтарын ұзарту үшін үш рет ота жасалыпты. Қиналғанын қанша білдіртпеуге тырысқанымен, анасы Розаның шығар жаны бөлек. Оның бейнеүндеуі департамент ұжымын бей-жай қалдырмаған. Еліміз бойынша мемлекеттік қызметшілер арасында тұңғыш рет қайырымдылық концертін өткізуге мұрындық болған.
Осы мәселеге қатысты Петропавл қалалық мәслихатының депутаты Павел Афанасьев Ғ.тұрсынбаевқа сын айтты. Оның сөзіне сенсек, акция «бопсалаушылықтың», демеушілікке зорлап-күштеудің үлгісі көрінеді. Ал Ғ.Тұрсынбаевтың бұған қарсы айтар уәжі аз емес. «Иә, Погодин атындағы орыс драма театрында «20 қайырымды іс» акциясы аясында концерт өткізуге тікелей атсалысқанымыз, ұйымдарға хат жолдап, билет сатып алуға өтініш жасағанымыз рас. Қаражаттың қайда аударылатынына дейін көрсетілді. Ұсынысымызды «Дом» республикалық қоғамдық қоры да қолдады. Тұрмысы төмен отбасыларға, сауығып кетуден үмітті бейкүнә балаларға қолымыздан келгенше жәрдемдессек, несі айып? Мүмкіндігі шектеулі балақайлардың жүздеріне күлкі үйіріліп, бал-бұл жайнап жүргендеріне ештеңе жетпейді». Зейнеткерлерге де, жетім балаларға да қамқор қолын созуға ниет еткен басшы ілкімді іске қатысты мұндай сынның айтылғанына қынжылатынын жеткізді.
Өмір ЕСҚАЛИ,
«Егемен Қазақстан»
Солтүстік Қазақстан облысы