Кеше Мемлекет басшысы Нұрсұлтан Назарбаев Ұжымдық қауіпсіздік туралы шарт ұйымының Бас хатшысы Николай Бордюжаны қабылдады, деп хабарлады Қазақстан Республикасы Президентінің баспасөз қызметі.
Н.Бордюжа Президентті ҰҚШҰ-ның ағымдағы жылдың желтоқсан айында Мәскеуде өтетін Ұжымдық қауіпсіздік Кеңесінің сессиясына дайындық барысынан хабардар етті.
– Тамыз айында Астанада ҰҚШҰ-ға мүше елдер Мемлекет басшыларының бейресми саммиті өтті. Жоғары деңгейде өткен кездесу өте нәтижелі болды. Президенттер Ұйымды дамытудың салиқалы, түбегейлі мәселелері жөнінде уағдаласты. Бүгін мен Қазақстан Президентін Мемлекет басшыларының Астанада қол жеткізген келісімдердің орындалу барысынан хабардар еттім. Мәскеудегі сессияда бірқатар мәселелер талқыланып, ҰҚШҰ-ның дамуына айтарлықтай серпін беретін құжаттар қаралатын болады. Ұйымға Төрағалық ету Қазақстан Республикасына өтеді. Әдетте, Қазақстанның төрағалығы өте креативті және табысты болады, сондықтан біз келесі жыл ҰҚШҰ қызметі қарқындылығымен және тиімді нәтижелерімен ерекшеленеді деп сенеміз, – деп атап өтті Н. Бордюжа.