![Елбасы әлем чемпионатының ашылу рәсіміне қатысты](/article_photo/1529028879_article_b.jpeg)
«Лужники» стадионында біріншіліктің ашылу салтанаты дәстүрлі театрландырылған көрініспен басталды. Сахналық қойылымнан соң ортаға британиялық әнші Робби Уильямс, опера әншісі Аида Гарифуллина, сонымен қатар композитор Александр Болдачев шығып, өз өнерлерін ортаға салды. Ал чемпионаттың ресми добын ресейлік тележүргізуші және осы біріншіліктің елшісі Виктория Лопырева алып шықты. XXІ әлем чемпионатының алғашқы соққысын әлемге әйгілі бразилиялық шабуылшы Роналдо мен турнирдің талисманы Забивака атты қасқыр жасады.
Мұнан соң алаңға америкалық актер, хип-хоп орындаушы Уилл Смит пен Ники Джем және албаниялық Эра Истрефи шығып, чемпионаттың Live It Up деп аталатын ресми әнұранын орындады.
Биылғы мундиальға әлемнің 32 құрамасы мен 736 футболшы қатысуда. Оған қоса, әр стадионға жиналатын жүз мыңға жуық жанкүйер мен әлемнің түкпір-түкпірінен телеэкран арқылы миллиондаған көрермен енді бір ай бойы футболмен тыныстайтын болады.
Чемпионаттың салтанатты ашылу рəсімі өткізілгеннен кейін жасыл алаңға Ресей мен Сауд Арабиясы құрамалары шықты. Матч басталмай тұрып Ресей Федерациясының президенті Владимир Путин мен Халықаралық футбол федерациясының (ФИФА) президенті Джанни Инфантино сөз сөйлеп, 2018 жылғы әлем чемпионатының ресми түрде ашылғанын мәлімдеді.
Ресей және Сауд Арабиясы құрамаларының арасындағы ойын 5:0 есебімен алаң иелерінің пайдасына шешілді. Ресей құрамасының және биылғы доп додасының алғашқы голын жартылай қорғаушы Юрий Газинский соқты. Сонымен қатар матчтың 23-минутында ресейлік футболшы Алан Дзагоев жарақат алып, ойынды мерзімінен бұрын аяқтауға мәжбүр болды. Дәрігерлердің айтуынша, Дзагоев алаңға енді үш аптадан соң оралуы мүмкін. Жарақат алған футболшының орнына Испанияның «Вильярреал» командасында доп тебетін шабуылшы Денис Черышев шығып, 43-ші және 90+1-ші минуттарда дубль жасап, командасын алға шығарды.
Екінші таймның 71-минутында Артем Дзюба мергендігімен көзге түссе, 90+4-ші минутта Александр Головин матчтың нүктесін қойды. Осылайша, әлем біріншілігінің алғашқы ойынында Ресей құрамасы Сауд Арабиясының командасын ірі есеппен жеңді.
Осымен, 31 күнге созылатын ала доптың аламаны да басталды. 2018 жылғы әлем чемпионаты 14 маусым мен 15 шілде аралығында Ресей Федерациясының 11 қаласындағы 12 стадионда өтеді.