Оның бір көрінісі күні кеше Елбасының «Болашаққа бағдар: рухани жаңғыру» бағдарламасы аясында Бәйдібек ауданында өткен «Қымызмұрындық» фестивалінде байқалды. Қазақ халқының ұлттық сусыны – қымыздың құндылығын насихаттауды мақсат еткен фестиваль аясында қолөнер шеберлерінің көрмесі, құлынды бие және сәйгүліктердің шеруі, ұлттық ат спорт түрлерінен көріністер, қымыз ішу сайысы өтті. Қатысушыларды құттықтаған облыс әкімі Жансейіт Түймебаев дәстүрдің мән-маңызына кеңінен тоқталды.
Жеңімпаздарды анықтаудың да оңай болмағаны анық. Өйткені сайысқа өз ауданында ең танымал да тұтынушылары көп қымыз баптаушылар қатысты. Олардың арасынан бас жүлдені Түлкібас ауданының қымыз баптаушылары иеленді. Тау баурайында бапталған бал қымызды көпшілік жоғары бағалады. Бас жүлде иегерлеріне құлынды бие тарту етілді. Бірінші орынды Бәйдібек ауданының, екінші және үшінші орындарды Түркістан қаласы мен Ордабасы ауданының қымыз баптаушылары иеленді. Ал қолөнершілер байқауында түркістандық шеберлердің бағы жанса, сәйгүліктер сайысында Шымкент қаласының атбегілері алдына жан салмады.
«Қымызмұрындыққа» келген көпшілікті, әсіресе қымыз құмарлар бәсекесі қызықтырды. Ұлттық сусынға тәбеті жақсылардың жарысына барлық ауданнан ынталы азаматтар қатысып, 10,5 тостаған қымызды бірінен соң бірін сімірген Арыс қаласы, Монтайтас ауылының тұрғыны Алмас Жаманқұлов жеңіске жетті. Фестиваль жеңімпаздары мен жүлдегерлер облыс әкімінің арнайы сыйлығымен, дипломдармен марапатталды.
Ғалымжан ЕЛШІБАЙ,
«Егемен Қазақстан»
Оңтүстік Қазақстан облысы