![Сарапшылар кеңесі Семейге барды](/article_photo/1529916584_article_b.jpeg)
Экспедиция мүшелері әуелі Семей қаласындағы Қазақ инновациялық-гуманитарлық заң университетінде Қазақстан Республикасы Президенті жанындағы «Рухани жаңғыру» бағдарламасын іске асыру жөніндегі Ұлттық комиссияның Орталық сараптама кеңесінің көшпелі мәжілісіне қатысты.
Сараптама кеңесінің көшпелі мәжілісі өңірлік жобалау кеңселері мен сарапшылар қауымдастығы арасындағы өзара байланысты жақсартуға, Шығыс Қазақстан облысында бағдарлама аясында іске асырылатын жобалардың сапасын арттыру бойынша ұсыныстарды талқылауға, сонымен қатар өлкетану бойынша оқулықтар әзірлеу, баспадан шығару, материалдық және материалдық емес мәдени ескерткіштер реестрін қалыптастыру тәжірибесін қолданысқа енгізуге бағытталды.
Көшпелі мәжіліске ЕҰУ проректорлары Дихан Қамзабекұлы, Серікжан Қанаев пен Елтаңба авторы Жандарбек Мәлібеков, әнші, профессор Кенжеғали Мыржықбай, тағы басқа сарапшы-ғалымдар, өңірдің ғылыми-педагогикалық қауымы қатысты.
Жиында Шығыс Қазақстан облысы ішкі саясат басқармасының басшысы Нелли Краснобаева өңірде «Рухани жаңғыру» бағдарламасының орындалу барысы туралы баяндады.
Жиынға қатысқан зиялы қауым «Қазақстанның киелі орындарының географиясы» республикалық және өңірлік жобалары туралы құнды ойларымен бөлісті.
Баяндамаларды талқылау барысында сарапшылар сапалы жобаларды іріктеу бойынша бірнеше ұсыныстар мен ұсынымдар берді. Олардың ішінде белгілі ғалым Арап Еспенбетов Абайдың әкесі Құнанбайдың есімі «Қазақстанның киелі орындарының географиясы» республикалық және өңірлік жобаларының тізіміне енгізілмей қалғанын қынжыла айтты. Сондай-ақ «Рухани жаңғыру» ғылыми-зерттеу институтының директоры Ерлан Арын, ЕҰУ ғалымдары Серікзат Дүйсенғазы мен Ерлан Сайлаубай айтқан құнды ойлар мен маңызды мәселелер де көпшіліктің көңілінен шықты.
Көшпелі мәжіліс аясында Елтаңба авторы Жандарбек Мәлібеков сөз алып, Қазақ инновациялық-гуманитарлық заң университетінің ректоры Шырын Құрманбаеваға Елтаңбаның жаңа нұсқасын табыс етті.
Сапар әрі қарай жалғасып, астаналық меймандарды Жарма ауданының әкімі Нұрлан Сыдықов қарсы алып, ауданға ат басын бұрған Елтаңба авторы Жандарбек Мәлібековке қазақи дәстүрмен тарту-таралғы жасады. Әрі қарай сапарын жалғастырған топ Жармадан кейін Ақсуат ауданындағы жаңадан салынған «Ырғызбай әулие» кешеніне бұрылып, әуелі Құран бағыштап, әулие туралы кітаптың тұсаукесер рәсіміне қатысты.
Кітапта Ырғызбай Досханаұлының ғұмыры мен заманы туралы тарихи деректер қалыптасқан канондық зерттеулерден өзгеше, яғни жаңаша сипатта берілген. Әулие заманы туралы сараланған түйінді ой-тұжырымдар тың әрі қызықты және тиянақты дәлелдерімен тартымды.
Сондай-ақ Ақсуат ауылында «Қазақ күресінен» Ырғызбай Досханаұлы атындағы VI халықаралық турнир және Тарбағатай ауданының орталығында ақындар айтысы өтті.
Базарбек ТҮКІБАЙ,
Қазақстан Жазушылар одағының мүшесі
АСТАНА – СЕМЕЙ – ҚАЛБАТАУ – АҚСУАТ