![Астана шежіресі. 2004 жыл](/article_photo/1530153831_article_b.jpeg)
9 қаңтар – Ресей президенті Владимир Путин Астанаға ресми сапармен келді. Осы сапарда екі ел басшылары Байқоңыр ғарыш айлағын пайдалану мерзімін 2050 жылға дейін ұзарту туралы келісімге қол қойды.
13 қаңтар – Елбасының нұсқауымен тәуелсіз Қазақстанның тарихындағы аса маңызды құжат «Мәдени мұра» мемлекеттік бағдарламасы қабылданды. Құжатта қарастырылған шараларды жүзеге асыру үшін ел бюджетінен 3 миллион 948 мың теңге бөлінді.
1 ақпан – Мемлекет басшысы Астана қаласындағы Ғылмани атындағы орталық мешітінде болып, мұсылман жамағатын Ораза айт мейрамымен құттықтады.
5 ақпан – Астана қаласында Ұлыбритания елшілігі ашылды. Аталмыш шараға келген Ұлыбритания және Солтүстік Ирландия құрама корольдігінің сыртқы істер министрі Дж.Строны Елбасы Нұрсұлтан Назарбаев қабылдады.
2 наурыз – Мемлекет басшысы көп балалы аналарды «Алтын алқа» және «Күміс алқа» белгілерімен наградтау туралы Жарлыққа қол қойды.
22 наурыз – Елбасы елордада өткен Ұлыстың ұлы күні – Наурыз мейрамына қатысып, қала тұрғындарымен емен-жарқын әңгімелесіп, көпшілікті мерекемен құттықтады.
6 сәуір – жапондықтар жалпы құны 3,5 млн доллар тұратын 23 жедел жәрдем көлігін Астана қалалық «Жедел жәрдем» стансасына тарту етті.
21 сәуір – Астана темір жол вокзалынан «Астана – Алматы» бағытында қатынайтын «Тұлпар» жолаушылар жүрдек пойызы алғашқы сапарға аттанды. Испанияда жасалған бұл пойыз екі қала арасын 13 сағатта жүріп өтеді.
19 мамыр – Бірінші «Көктал» тұрғын алабында жаңадан қазақ орта мектебі ашылып, оған әйгілі ғалым Әлкей Марғұлан есімі берілді.
28 мамыр – Шығыс Қазақстан облысында еліміздің 15 миллионыншы тұрғыны дүниеге келді. Оның есімі – Перизат Ускембаева.
8 маусым – Астана қаласында АҚШ елшілігі ғимаратының іргетасын қалау рәсімі өтті.
10 маусым – Астанадағы ірі рухани орталық Қазақстан Республикасының Ұлттық академиялық кітапханасы салтанатты түрде ашылды. Бұл шараға Елбасы Н.Назарбаев пен Мәскеу мэрі Ю.М.Лужков қатысты.
18 маусым – Л.Н.Гумилев атындағы Еуразия ұлттық университетінде «Еуразиялық ықпалдастық: осы заманғы даму үрдістері және жаһандану сынақтары» деген тақырыпта халықаралық форум өтті.
8 шілде – Елбасы жұмыс сапарымен Ақмола облысында болып, «Бурабай» курортты аймағындағы 37 метрлік Абылай хан стелласының ашылу салтанатына қатысты.
7 қыркүйек – Астанада Қазақстан әйелдерінің IV форумы өтті. Форумда сөз сөйлеген Елбасы Н.Назарбаев елдегі гендерлік ахуалды жақсарту мақсатында жедел түрде мемлекеттік бағдарлама қабылдап, оны келесі 2005 жылдан бастап жүзеге асыруды тапсырды.
8 қазан – Астана қаласында алғаш рет «Экспонедвижимость-2004» отандық көрмесі өтті.
16 желтоқсан – Мемлекет басшысы Есіл өзенінің сол жақ жағалауында құрылысы жүріп жатқан Жоғарғы сот, Парламент Сенаты мен Мәжілісінің ғимараттарын аралап көрді. Елбасы жұмыс қарқынына оң баға беріп, бұл нысандар Қазақстан жаңаруының символы болашақта бұл арада біріккен басқару һәм атқару орталығы пайда болатыны жайлы атап өтті.
24 желтоқсан – жұмысы үш жыл бұрын басталған Қазақстан Республикасы Президентінің резиденциясы «Ақорда» салтанатты түрде ашылды. Нысанды жобалаушы сәулетші-дизайнерлер М.Гуалаци мен А.Мольтени. Ғимараттың жалпы ауданы 36 720 шаршы метр. Төбесімен қоса алғандағы биіктігі – 80 метр.
26 желтоқсан – Астана қаласында «Суасты әлемі» мұз қалашығы ашылды.
Дайындаған Бекен ҚАЙРАТҰЛЫ,
«Егемен Қазақстан»