Тынышгүл Ақайқызының ақын Сәнді Ақылайдың сөзіне жазған «Менің тілім» әні кеше ғана Мәскеу аренасында шырқалды. Тынышгүл Ақайқызының әнін Қазақ елінің намысын жыртып, Көк байрағын желбіреткен намыскер ұлы Ибрагим Ескендір шырқады.
– Тынышгүл Ақайқызы шығарған әннің Мәскеу төрінде орындалуы біз үшін ғана емес, бүкіл қазақ жұрты үшін қуанышты оқиға болды. Ибрагим Ескендірге де үлкен рахмет! – деді «Шығыс» әскери өңірлік қолбасшылығы баспасөз қызметінің сержанты Меруерт Құрманғажина.
Тынышгүл Ақайқызы – республикалық «Жас ұлан» фестивалінің лауреаты. Астанадағы Тәуелсіздіктің 25 жылдығына арналған республикалық ақын-композиторлар арасында өткізілген патриоттық әндер сайысының дипломанты.
Айта кету керек, Тынышгүл Ақайқызы – көптеген әндерін әскери тақырыпқа арнаған композитор Теміржан Базарбаевтың тікелей шәкірті. «Байланысшылар ұраны», «Сарбаздар сәлемі», «Әскери полиция маршы», «Барлаушылар ұраны» сияқты отызға жуық патриоттық тамаша әндердің авторы.
Раушан НҰҒМАНБЕК,
журналист
СЕМЕЙ