Мұның сыртында «20 игі іс» деген тақырыппен өткізілген қайырымдылық шаралары жасы ұлғайған және мүмкіндігі шектеулі жандарға, табысы аз көп балалы отбасыларға моральдық және материалдық тұрғыдан қолдау көрсетуге бағытталды. Дегенмен, «бұл ән бұрынғы әннен өзгерек» дегендей, «Құтты мекен Ақтөбеден – арайлы Астанаға» деген тақырыппен ұйымдастырылған автокеруеннің орны да, жолы да бөлек болды деп айтуға толық негіз бар.
Аталған автокеруен өзінің бағытын 25 маусым күні Қызылордаға қарай бұрған еді. Оның құрамындағы қоғам, мәдениет пен өнер қайраткерлері, ғалымдар мен жастар өкілдері бір апта бойы ел-жұртпен емен-жарқын пікір алысып, Астананың абыройын асқақтатты. Олар Қызылорда, Түркістан, Жамбыл, Қарағанды облыстарының орталықтарында және Алматы мен Жамбыл қалаларында болған кездесулерде еліміздің жүрегі Астана туралы тартымды әңгімелер өрбітті.
Астана тұтастай ел өңірлерінің өсіп-өркендеуіне басты темірқазық бола алатыны жөнінде өрелі ой-пікірлер де сабақталды. Астанаға қарап ой түзеу де, Астанаға қарап бой түзеу де жастарға әбден жарасады. Сондықтан да автокеруен құрамында жастардың көбірек болуына көңіл бөлінді. Бұл туралы аталған мәнді де маңызды мәдени-көпшілік шараның басы-қасында жүрген Ақтөбе облыстық мәдениет, архивтер және құжаттама басқармасының басшысы Маржан Қорғанбаева айтып берді.
Автокеруен аталған уақыт аралығында еліміздің 11 елдімекенінде болып, ел-жұрт пен Астана арасындағы байланыстар мен қарым-қатынастардың жақындай түсуіне және тұрғындар арасында Астанаға деген сүйіспеншілік сезім мен махаббаттың орнығуына алғышарт жасай алғаны оның алға қойған басты мақсатының орындалғанын көрсетеді. Қысқасы, Ақтөбеден елордаға бағыт ұстаған автокеруен 5170 шақырым жолын артқа тастап, шілденің алғашқы күнінде Астана қаласына жетті. Сол күні ақтөбелік өнер шеберлері елорданың төрінде үлкен мерекелік концерт қойды.
Темір ҚҰСАЙЫН,
«Егемен Қазақстан»
АҚТӨБЕ
