Торқалы той басталды.
Бүгін Астанадағы Тәуелсіздік сарайында Қазақстан Республикасының Тәуелсіздігінің
20 жылдығына арналған салтанатты жиналыс өтеді. Тойымыз тарқамасын,
ардақты ағайын!
ЕРЕН ЕҢБЕК ЕЛЕНДІ
Кеше Тәуелсіздіктің 20 жылдығы мерейтойының қарсаңында Елбасы Нұрсұлтан Назарбаев еліміздің әлеуметтік-экономикалық және мәдени-ғылыми дамуына, Қазақстан халқының бірлігі мен ынтымағының нығаюына айрықша үлес қосқан бір топ азаматқа мемлекеттік және мерейтойлық наградалар, сонымен бірге Мемлекеттік сыйлықтар тапсырды. Марапатталғандардың қатарында соғыс және еңбек ардагерлері, мәдениет, ғылым, білім, денсаулық сақтау салаларының қайраткерлері, өндірістік сала, бизнес өкілдері, құқық қорғау және әскери органдардың қызметкерлері, спортшылар бар. Награда тапсыру рәсімін қысқаша сөзбен ашқан Елбасы Н.Назарбаев алдымен жиналғандарды Тәуелсіздіктің 20 жылдығымен құттықтады. Біз көп қиындықтарды еңсеріп, көп шаруалар жасадық, сөйтіп, елімізді дүние жүзі танитын, сыйлайтын әрі сенетін жағдайға жеткіздік. Осының бәрі барлық қазақстандықтардың ерен еңбегінің арқасында мүмкін болды. Ұлы мерекеміздің қарсаңында мен өз Жарлығыммен айрықша көзге түскен 1,5 мыңға жуық қазақстандықтарды орден-медальдармен наградтадым. Әрине, барлық марапатты өз қолыммен тапсыруға мүмкіндік жоқ, сондықтан оларды жергілікті жерлерде әкімдіктер мен салалық министрліктер басшылары тапсыратын болады. Мен тек осы жерге шақырылған сіздерге марапатты өз қолыммен тапсырмақпын, дей келіп, Елбасы «Халық Қаһарманы» атағы берілген Ғ.Байтасов, «Қазақстанның Еңбек Ері» атағына лайықты деп табылған Ұ.Қарабалин мен С.Терещенконың ерліктері мен еңбектерін ерекше атады. Жамбыл облысы ішкі істер департаменті жол полициясының взвод командирі Ғазиз Байтасов қауіпті қылмыскердің зияны басқа адамдарға тимеуі үшін оны қауіпсіздендіру кезінде батылдық пен ержүректіліктің ерен үлгісін көрсетіп, қаза тапты. Оның жанқиярлық ерлігі барша қазақстандықтар мен ұрпақтардың есінде қалсын және ол басқа полиция қызметкерлеріне үлгі болсын деп оған «Халық Қаһарманы» атағын беру туралы шешім қабылдадым, деді Елбасы. Сонымен қатар, осы қылмыскерді залалсыздандыру кезінде ерлік көрсеткен құқық қорғау органдарының басқа да қызметкерлері тиісті марапаттарын алатын болады. «Қазақстанның Еңбек Ері» атағы Тәуелсіз Қазақстанның тұңғыш Премьер-Министрі Сергей Терещенкоға берілетінін айта келіп, Елбасы 1990 жылдардың басындағы қиын-қыстау кезеңдерде оның өз қасынан табылып, ерен еңбек сіңіргенін айтып өтті. Осындай атақты алған Ұзақбай Қарабалиннің де мұнай-газ саласындағы айрықша еңбегі аталды. Ол бұл саланың Қазақстандағы бірегей маманы болып саналады, деді Елбасы. Жоғары наградаға ие болу зор бақыт болумен қатар, үлкен жауапкершілік те жүктейді, дей келіп, жоғары награда алғандарды шын жүректен құттықтайтынын жеткізді. Сонымен, «Халық Қаһарманы» атағының белгісі Ғазиз Байтасовтың жесірі Гүлжамал Тәжиеваның қолына тапсырылды. Ол Президенттің қолынан награданы алып тұрғанда ел үшін жасалған ерліктің ешқашан да өшпей, оның даңқы әрқашан да аса беретіндігіне көз жеткендей болды. Одан кейін «Қазақстанның Еңбек Ері» атағының белгісі «Қазақ мұнай және газ институты» АҚ бас директоры Ұзақбай Қарабалин мен «Интеграция» халықаралық қоры басқармасының төрағасы Сергей Терещенкоға берілді. «Отан» ордені белгілі әнші Әлібек Дінішев пен ауыл шаруашылығы саласының майталмандары – «Ижевский» ӨК бас директоры Ибрагим Жанғоразов пен «Родина» агрофирмасы» ЖШС бас директоры Иван Сауэрге берілді. «Қазақстан Республикасының Тұңғыш Президенті – Елбасы Нұрсұлтан Назарбаев» бірегей орденімен Ұлттық ғарыш агенттігінің төрағасы Талғат Мұсабаев пен Мемлекеттік хатшы Қанат Саудабаев марапатталды. І дәрежелі «Барыс» ордені 1980 жылғы Олимпиада чемпионы, даңқты балуан, қазіргі «Ұлттық командалар мен спорттық резерв дирекциясы» РМҚК жаттықтырушысы Жақсылық Үшкемпіровке берілді. ІІ дәрежелі «Барыс» орденімен Қорғаныс министрі Әділбек Жақсыбеков, Сенат Төрағасы Қайрат Мәми, «Қазақстан темір жолы» ҰК» АҚ президенті Асқар Мамин, «Иволга холдинг» ЖШС бас директоры Василий Розинов, «Ардагерлер ұйымы» РҚБ орталығы кеңесінің төрағасы Қайырбек Сүлейменов наградталды. Ал ІІІ дәрежелі «Барыс» орденін ENRC PLC акционерлері әрі негізін қалаушылары Александр Машкевич пен Патох Шодиев және Президенттің Іс басқарушысы Серік Үмбетов алды. Президент І дәрежелі «Даңқ» орденімен еліміздің Бас әскери прокуроры Ерғали Мерзадиновты марапаттады. Елбасының өз қолымен марапаттауы кезінде «Парасат» орденін Б.Жарбосынов атындағы урология ғылыми орталығының бас директоры Мырзакәрім Алшынбаев, Қарағанды облысының әкімі Серік Ахметов, Жоғарғы Соттың Төрағасы Бектас Бекназаров, Қаржы министрі Болат Жәмішев, Әділет министрі Рашид Түсіпбеков алды. «Құрмет» ордені Павлодар қаласындағы лицей мұғалімі Татьяна Бичиневаға, «Қазақмыс корпорациясы» ЖШС машинисі Мұратбек Дарановқа, Сыртқы істер министрі Ержан Қазыхановқа, Қызылорда облысының әкімі Болатбек Қуандықовқа, Шығыс Қазақстандағы «Ана мен бала орталығының» директоры Рая Рахимоваға және 1986 жылғы Желтоқсан оқиғасына белсене қатысушы Жансая Сәбитоваға берілді. Ал «Қазақстанның еңбек сіңірген қайраткері» құрметті атағы Ш.Айманов атындағы «Қазақфильм» АҚ актрисасы Гүлнәр Досматова мен Т.Жүргенов атындағы Қазақ ұлттық өнер академиясы кафедрасының меңгерушісі Дариха Тұранқұловаға берілді. Биылғы жылғы Мемлекеттік сыйлыққа 12 жұмыс сынға түсіп, соның екеуі жеңімпаз деп танылған еді. Елбасы жеңімпаздарды айрықша құттықтай келіп, Микробиология және вирусология институтындағы А.Садановтың жетекшілігімен бірнеше ғалым дайындаған еңбекке Мемлекеттік сыйлық берілгенін айтты. Сөйтіп, осы еңбек бойынша А.Саданов, С.Айткелдиева, Н.Гаврилова, И.Ратникова, Ұ.Ыдырысова, В.Кан және Е.Шорабаев Мемлекеттік сыйлық лауреаттары атанды. Сонымен бірге, белгілі математик, физика-математика ғылымдарының докторы, академик Асқар Жұмаділдаев «Жалпыланған коммутаторлар, когомологиялар және тепе-теңдіктер» атты жұмыстар циклы үшін Мемлекеттік сыйлық алды. Сыйлық алған ғалым: «Мен өзімді жиырмадағы жас жігіттей сезініп тұрмын. Бойыма жаңа қуат, жаңа күш енгендей. Еңбегімді зор бағалаған Сізге деген алғысым шексіз, Сіз маған жаңа шабыт бергендей болдыңыз. Рахмет, аға, Тәуелсіз Қазақстан жасасын!» деді. Марапатталғандарды шын жүректен құттықтаған Елбасы Н.Назарбаев пенде болғаннан кейін әркімнің еңбегінің бағаланғаны өзі үшін ғана емес, отбасы, балалары, туыстары үшін де үлкен мерей екенін атап көрсетті. Өздеріңіздің еңбектеріңізбен, ақыл-ойларыңызбен жеткен марапаттарыңыз құтты болсын. Жаңа табыстарға бастасын, деді. Сонымен бірге, Қазақстан тәуелсіздігінің берік орнауына өз хал-қадерінше еңбек сіңірген барлық қазақстандықтарға да ризашылығын жеткізді. Осы күні Елбасы Нұрсұлтан Назарбаев Тәуелсіздікті нығайту мен өркендетуге сіңірген еңбектері үшін «Қазақстан Республикасы Тәуелсіздігіне – 20 жыл» мерейтойлық медалін Премьер-Министр К.Мәсімовке, Сенат Төрағасы Қ.Мәмиге, Мемлекеттік хатшы Қ.Саудабаевқа, Президент Әкімшілігінің Басшысы А.Мусинге, Конституциялық Кеңес Төрағасы И.Роговқа, Жоғарғы Сот Төрағасы Б.Бекназаровқа, Ұлттық Банк төрағасы Г.Марченкоға, Орталық сайлау комиссиясының төрағасы Қ.Тұрғанқұловқа, «Нұр Отан» ХДП Төрағасының бірінші орынбасары Н.Нығматулинге, Президенттің көмекшісі – Қауіпсіздік Кеңесінің хатшысы М.Тәжинге, Жоғары Сот Кеңесінің төрағасы О.Жұмабековке, Бас Прокурор А.Дауылбаевқа, Ұлттық қауіпсіздік комитетінің төрағасы Н.Әбіқаевқа, Республикалық бюджеттің орындалуын бақылау жөніндегі есеп комитетінің төрағасы О.Өксікбаевқа, Президенттің Іс басқарушысы С.Үмбетовке, Экономикалық және сыбайлас жемқорлыққа қарсы күрес агенттігінің (қаржы полициясы) төрағасы Қ.Қожамжаровқа, Мемлекеттік қызмет істері агенттігінің төрағасы Ә.Байменовке, Президенттің Күзет қызметінің бастығы М.Аюбаевқа, «Сырбар» сыртқы барлау қызметінің директоры А.Жанқұлиевке, Астана мен Алматы қалалары және барлық облыстар әкімдеріне өз қолымен тапсырды.* * *
Елбасы Нұрсұлтан Назарбаевтың Жарлығымен Тәуелсіздіктің 20 жылдығына орай наградталған бір топ азаматтарға марапатты Мемлекеттік хатшы Қанат Саудабаев табыс етті. Олардың арасында І дәрежелі «Барыс» орденін алған «Жібек жолы-Қазақстан» ҰК» АҚ президенті Асқар Құлыбаев, ІІ дәрежелі «Барыс» орденін алған Орталық Азия университетінің профессоры Жұматай Әлиев, ІІІ дәрежелі «Барыс» орденін алған Президенттік мәдениет орталығының директоры Мырзатай Жолдасбеков, Алматы облысы Еңбекшіқазақ ауданының әкімі Әлихан Тойбаев, бокстан кәсіпқойлар арасындағы әлем чемпионы Бейбіт Шүменов болды. Сонымен бірге, Мемлекеттік хатшы Республикалық Ұланның бұрынғы қолбасшысы Абай Тасболатовқа І дәрежелі «Даңқ», Ұлттық қауіпсіздік комитеті төрағасының орынбасары Қабдолкәрім Әбдіқазымов пен Ішкі істер әскерлерінің қолбасшысы Руслан Жақсылықовқа және Бас прокурордың бірінші орынбасары Иоганн Меркельге ІІ дәрежелі «Даңқ» орденін табыс етті. Ал Президент Әкімшілігінің Ақпараттар және ақпараттық ресурстарды қорғау бөлімінің меңгерушісі Ғани Тілеубаев ІІ дәрежелі «Айбын» орденін алды. Қанат Саудабаевтың қолынан «Парасат» орденін алғандардың арасында Өскемен қаласының әкімі Ислам Әбішев, К.Байсейітова атындағы Ұлттық опера және балет театрының директоры Төлеубек Әлпиев, «БанкЦентрКредит» АҚ директорлар кеңесінің төрағасы Бақытбек Байсейітов, Президенттің Парламенттегі өкілдігінің басшысы Асқар Бейсенбаев, «Базис» құрылыс компаниясы» ЖШС директорлар кеңесінің төрағасы Александр Белович, Президент Әкімшілігі Басшысының орынбасары Талғат Донақов, Сыртқы істер министрлігінің жауапты хатшысы Рәпіл Жошыбаев, Ұлттық инженерлік академияның бірінші вице-президенті Нәдір Нәдіров, «Казахстанская правда» республикалық газеті» АҚ басқарма төрағасы Жанай Омаров, Солтүстік Қазақстан облысындағы Ғ.Мүсірепов ауданының әкімі Марат Тасмағанбетов, Астана қаласы әкімінің бірінші орынбасары Сергей Хорошун, «Қазақстанның халық банкі» АҚ басқарма төрайымы Үміт Шаяхметова, Президент Әкімшілігі Құқық қорғау жүйесі бөлімінің меңгерушісі Алик Шпекбаев болды. ІІ дәрежелі «Достық» орденін Қ.Саудабаев «Mabetex group» компаниясының басшысы Паколли Бехджет пен Ресейдің С.Герасимов атындағы Бүкілресейлік кинематография институтының ректоры Владимир Малышевке тапсырды. Мемлекеттік хатшының қолынан Президент Әкімшілігі Мемлекеттік-құқықтық бөлімінің меңгерушісі Инна Ахметова, Талдықорған қаласының әкімі Махаббат Бигелдиев, «Қазақтелеком» АҚ басқармасының төрағасы Қуанышбек Есекеев, «Аргументы и факты в Казахстане» газетінің бас редакторы Сергей Кузовников, Сыртқы істер министрінің орынбасары Қайрат Сарыбай, «Нұр Отан» ХДП хатшысы Қайрат Сатыбалды «Құрмет» орденін алды. Ал «Егемен Қазақстан» республикалық газеті» АҚ президенті Сауытбек Абдрахманов, «Караван» республикалық газетінің бас редакторы Әділ Ибраев және Астана қаласындағы мемлекеттік филармонияның актрисасы Татьяна Хасьянова «Қазақстанның еңбек сіңірген қайраткері» атағын алды. Президент Жарлығымен берілген марапаттар осы күні басқа жерлерде де құрметпен тапсырылып жатты. Соның ішінде «Құрмет» орденімен марапатталған әріптесіміз Сүлеймен Мәметке Жазушылар одағы басқармасының төрағасы Н.Оразалин марапатын редакциямызға әкеліп тапсырды. Ал «Қазақстан Тәуелсіздігіне – 20 жыл» мерекелік медалімен наградталған әріптестеріміз Самат Мұса, Қайсар Әлім, Марат Аққұл, Сүлеймен Мәмет, Мәдина Жолдасбаева және Базаркүл Ахметке марапаттары Байланыс және ақпарат министрлігінде табыс етілді. Еңбектері еленген барлық әріптестерімізге отбасылық амандық пен шығармашылық жаңа табыс тілейміз. Жақсыбай САМРАТ, Суреттерді түсіргендер С.БОНДАРЕНКО, Б.ОТАРБАЕВ.