Погодин атындағы орыс драма театрында «Қазақстан жас көшбасшыларға үміт артады» жастар форумы өтті. Салтанатты шара алдында жиынға қатысушылар Тәуелсіздік құрдастарының шығармашылық көрмесін тамашалады. «Елге тіле!» атты флэшмоб ұйымдастырылды. Мұнда Қызылжар өңірі жұртшылығының ел Тәуелсіздігінің 20 жылдық мерейтойына арналған игі тілек-лебіздері топтастырылып, көшелерде орнатылған көгілдір экрандар арқылы күн сайын берілетін болады.
Жиында облыс әкімінің орынбасары Фархад Қуанғанов аймақ басшысы Серік Біләловтің құттықтауын оқып берді. Бірінші болып облыстық ардагерлер кеңесінің төрағасы Ескендір Елеусізов сөйледі. Ол азаттық деген қасиетті де киелі ұғымның бастауында 1986 жылғы Желтоқсан көтерілісінің жас боздақтары тұрғанын, олардың өмірлік ұстанымы, ерлік істері кейінгі толқынға үлгі екенін жеткізді. Уәлиханов ауданы “Қызыл ту” жастар ұйымының мүшесі Яна Голубцова жастардың қоғамдық өмірдегі рөліне тоқталса, М. Қозыбаев атындағы Солтүстік Қазақстан мемлекеттік университеті кәсіподақ ұйымының төрайымы Зарина Ақамбаева үкіметтік емес ұйымдар мен билік арасындағы сындарлы байланысты жетілдіру жолдарын сөз етті.
Бұдан кейін 12 аталым бойынша іріктеліп алынған лауреаттарды марапаттау басталды. Жеңімпаздар арасында СҚМУ энергетика және машина жасау факультетінің деканы, техника ғылымдарының кандидаты Нәби Нәбиев, жастар мәслихатының вице-спикері Владимир Витченко, мұғалім Данияр Уәлиев, спортшы Ирина Сорокина, «Зағиптар» қоғамының төрайымы Жанел Сүгірбаева, механизатор Евгений Пак, тағы басқалар бар.
Бұлардың есімдері облыстың «Алтын кітабына» жазылатын болады.
Өмір ЕСҚАЛИ,
Солтүстік Қазақстан облысы.