Жалпы 5 күнге созылған этноауыл жұмысын 30 мыңға жуық адам тамашалады. Олардың ішінде алыс-жақын шетелдерден, Ресейден, Қытайдан, Испаниядан келген қонақтар да бар. Этноауыл Астана қаласы әкімінің орынбасары Ермек Аманшаевтың, «ҚазМұнайГаз» компаниясының мұнайды тасымалдау жөніндегі басқарушы директоры Нұртас Шмановтың, «ҚазТрансОйл» АҚ бас директоры Димаш Досановтың, шығармашылық ұжымдар мен орындаушылардың қатысуымен 3 шілде күні ашылды. Жалпы ерекше ауыл жұмысын ұйымдастыруға «ҚазТрансОйл» компаниясының 150-ге жуық қызметкері атсалысты.
Этноауыл кешені компанияның өндірістік нысандары орналасқан еліміздің 11 өңірі ұсынған сан түрлі экспонаттармен жабдықталды. Соның ішінде Маңғыстаудан келген компания өкілдері аталған өңірдің тарихи жерлеріне саяхаттауға мүмкіндік берсе, ақтөбелік мұнайшылар жабдықтаған «Мұғалжар» еліміздің ұлттық киімдері мен Қазақстан халқы Ассамблеясының қызметін көрсетті.
Сондай-ақ Қарағанды мұнай құбыры басқармасы ұйымдастырған «Сарыарқа» киіз үйінде Елбасы Нұрсұлтан Назарбаевтың еңбек жолы, саясаттағы алғашқы қадамдары мен қолданған заттары туралы құнды деректер қойылған. Ал Астананың бүгінгі жарқын келбеті мен әсем ғимараттары павлодарлық мұнайшылар жабдықтаған «Баянауыл» киіз үйінде көрініс тапты.
Сонымен қатар шымкенттік мұнай құбыры басқармасының қызметкерлері келушілерді Ұлы Жібек жолы туралы, сондай-ақ өңірдегі тарихи және ежелгі ескерткіштер туралы ақпараттармен таныстырды. Оның ішінде Қожа Ахмет Ясауи және Арыстан баб кесенелері, ежелгі қалалар Отырар және Түркістан туралы деректер бар. Ал «Ұлытау» деп аталатын Жезқазған өңірінің мұнайшылар жабдықтаған киіз үйі Алтын-Емел, Іле Алатауы, Шарын, Бурабай, Қарқаралы сияқты ұлттық парктердің тарихы туралы сыр шертеді.
Ал Маңғыстау мұнай құбыры басқармасы кадр қызметінің бастығы Данияр Шамжанов Маңғыстау облысы этноауылды «Аспан астындағы мұражай» деген тақырып аясында киіз үйді жабдықтағанын атап өтті. «Қазақтың қасиетті жерлері мен өңір тарихын тереңнен түсіндіретін экспонаттармен жабдықтадық. Шерқала тауы мен Түпқараған түбегі, еліміздің 1000 теңгесінде бейнеленген Бозжыра тауының макеттерімен жабдықтадық», деді ол.
Шараны ашқан «ҚазМұнайГаз» компаниясының мұнайды тасымалдау жөніндегі басқарушы директоры Нұртас Шманов жиналғандарды Астананың 20 жылдық мерейтойымен құттықтады. «Осы шараны өткізуге атсалысқан барлық компания қызметкерлеріне алғыс білдіремін. Шара барысында Қазақстанның 11 аймағынан келген қызметкерлер этноауыл кешенінде облыстардың мәдени мұралары туралы тереңнен әңгімелеп, келушілерді өңірлердің тарихымен таныстырды. Сондай-ақ 500-ге жуық әлеуметтік тұрғыдан осал топтар үшін арнайы қайырымдылық және мәдени іс-шаралар өткізді. Мұның барлығы да компания қызметкерлерінің отансүйгіштік қасиеті мен азаматтық парызына бей-жай қарамайтынын көрсетеді», деді Н. Шманов.
Өз кезегінде сөз алған «ҚазТрансОйл» АҚ бас директорының орынбасары Сәбит Арынов Астананың 20 жылдығымен және «Кеңқияқ» мұнай бекетінің ашылуымен құттықтады. «Астананың 20 жылдығы қарсаңында, еліміз үшін айтулы оқиғалардың бірі «Кеңқияқ» бас мұнай айдау станциясы қайта іске қосылды. Бұл еліміздің Қытайға мұнай тасымалын 20 млн тоннаға дейін арттыруға мүмкіндік беретін «Кеңқияқ-Атырау» мұнай құбыры жобасын жүзеге асырудағы айшықты қадам», деді ол.
«ҚазТрансОйл» АҚ бас директорының орынбасары Шара Таңатарова да барша қауымды Астананың 20 жылдығымен құттықтап, әріптестеріне өз ризашылығын білдірді. «Этноауыл жобасы баршамызға ұлтымыздың өткені мен бүгініне, тарихымызға қайта көз жүгіртуге мүмкіндік берді. Осы орайда барлық әріптестерімді этноауылдың табысты жұмысымен құттықтап, жаңа жетістіктер тілеймін», деді.
Сондай-ақ «ҚазТрансОйл» АҚ мереке күндері қайырымдылықтан да шет қалған жоқ. Қайырымдылық шарасы аясында кешенге аз қамтылған отбасылардың балалары мен мүгедектер, ардагерлер сияқты жалпы саны 500-ден астам адам қамтылды. Ардагерлерге арналған қайырымдылық акциясына 100-ден аса ардагер қатысып, өңірлер тарихымен танысты.
Кеш барысында «ҚазТрансОйл» АҚ басшылығы Астана мерекесіне орай жасаған сый, этноауыл мен мерекелік концерттерді ұйымдастыруға атсалысқан мұнай құбыры басқармалары мен орталық аппарат департаменттері ұжымдарын марапаттады. Гала-концертте отандық танымал әншілер ән шырқап, кеш соңы «ҚазТрансОйл» АҚ шығармашылық топтарының өнер көрсетуімен аяқталды.
Мәдина ЖӘЛЕЛҚЫЗЫ,
«Егемен Қазақстан»