Елімізде алғаш рет ашылған тақырыптық тур Қазақстанның Тұңғыш Президенті оқыған және еңбек еткен нысандарды аралап көруге арналған. Турдың алғашқы аялдамасы – Теміртаудағы Тұңғыш Президенттің тарихи-мәдени орталығы. Туристер мұнда 6 экспозициялық залды аралап, ондағы 3 мыңнан астам экспонатпен танысуға мүмкіндік алады.
Одан кейін саяхатшы қауым атақты Қарағанды металлургиялық комбинатының тыныс-тіршілігімен танысады. Мұнда жас горновой Нұрсұлтан Назарбаев Қазақстанның алғашқы шойыны алынған тарихи сәттің куәгері болған. Әрі қарай туристер Елбасы білім алған Қарағанды мемлекеттік техникалық университетінде болып, альма-матерді аралап көреді. Турдың соңғы нүктесі – Қарағандыдағы шахта-музей. Бұл жерде туристер жер астына түсіп, өздерін аз ғана уақыт болса да кенші кейпінде сезіне алады.
– Астанаға келетін қонақтар туристік саланың жетістігіне әрі қарай қызығушылық танытар болса, Қарағандыны да еске алар деген ойдамыз. Егер де біз берік байланыс орнатар болсақ, онда туристер ағынын 2-3 есеге көбейте аламыз деп жоспарлап отырмыз, – дейді облыстық кәсіпкерлік басқармасының басшысы Татьяна Аблаева.
Қарағанды облысына бір жылда 300 мыңнан астам турист келеді екен. Өңірде 60-тан астам бекітілген туристік маршрут қонақтарға қызмет көрсетеді.
Қайрат ӘБІЛДА,
«Егемен Қазақстан»
Қарағанды облысы
