Облыс әкімі Нұрлан Ноғаев жергілікті қазынадан 1,7 млрд теңге бөліп, қорғаныс бөгетін салуды қолға алды. Екі жылға созылған құрылыс жұмыстары да бітті. Биіктігі 3,6 м, ұзындығы 1,5 км бөгет енді Жайық суының ескі қала орнын басуына жол бермейді.
Сарайшық – «Рухани жаңғыру» бағдарламасы аясында Атырау облысынан «Қазақстанның киелі жерлері географиясы» жобасына енген тарихи орын. «Жібек жолы бойында орналасқан бұл көне шаһар енді туристік орталыққа айналады. 2015 жылы қалашық орнын Жайықтың тасқын суынан сақтап қалу үшін қаражат бөлінді. Қазақстандықтар үшін маңызды мереке Астананың 20 жылдығында жұмыстың аяқталғаны да жақсылықтың нышаны. Мемлекет басшысы еліміздегі киелі орындарға әркез көңіл бөліп келеді. Болашақта туристік орталық салуды жоспарлап отырмыз», дейді облыс әкімінің орынбасары Әлібек Нәутиев.
Енді көне қала орнында қазіргі заманғы талаптарға толық жауап беретін сапар орталығы болады. Кешен туризмнің дамуына да септігін тигізеді деген жоспар бар.
Бақытгүл БАБАШ,
«Егемен Қазақстан»
АТЫРАУ