Шалқар аудандық білім бөлімінің бас маманы Дидара Ақмалайдың айтуынша, бұл әдеттегі ағаш үйлердің бірі емес, «жасыл экономика» мен «жасыл әлем» стандарттарына сәйкес құрастырылған инновациялық киіз үй болып шықты. Оның бұған дейінгі көз үйренген киіз үйлерден артықшылығы мен өзгешелігі қандай?
– Заманауи үлгіде жабдықталған әрі түрлі түстермен көмкерілген ІТ ағаш үйдің ішіне физика пәні мұғалімдері мен оқушылардың бірлесіп жасаған туындылары қойылды. Мұндағы жергілікті жаңашылдардың қолынан шыққан күн мен желдің қуатын пайдалану арқылы жұмыс істейтін қондырғылар мен аспаптар ешкімді енжар қалдыра алмайды. Сонымен бірге ащы суды тұшыту құралдары да көпшіліктің қызығушылығын туғызып отыр, – дейді Шалқар қаласындағы №7 орта мектептің директоры Гүлсайран Ыбыраева.
Расында да қара дүрсін емес, тиісті ғылыми-зерттеулер мен жұмыстардың нәтижесінде туындаған өміршең техникалық құралдарды сериялық өндіріске қойса өзін-өзі толығымен ақтар еді-ау деген ой көлденеңдей береді. Дәл осы тұста өзіміз тікелей куә болған жаңашылдықтың бір көрінісі туралы айта кетсек, велосипед тебу арқылы ұялы телефонның қуатын толтыруға болады екен. Мұндай мысалдар жеткілікті. Осындайда еріксіз жарайсыңдар шалқарлық жас өрендер, дегім келеді.
Темір ҚҰСАЙЫН,
«Егемен Қазақстан»
Ақтөбе облысы,
Шалқар ауданы
