Аталған алаңда сонымен қатар ересек балалар отрядымен тренинг форматында кәсіптік бағдарлау бойынша жұмыстар да жүргізілетінін айта кеткеніміз жөн. Бүгінде болашақ мамандығыңды дұрыс таңдаудың маңыздылығы зор. Бұл – әр жеткіншектің алдында тұрған өзекті мәселе. Үдемелі даму үстіндегі әлемде футурологтар қайсыбір мамандық түрлерінің мүлдем сұраныссыз қалып, жаңа бір мамандық түрлерінің пайда болатыны туралы айтады. Сондықтан да мамандық таңдауда бірқатар факторды алға тарта отырып, дұрыс қадам жасау аса маңызды. «Факел» маусымдық сауықтыру лагері сол психология мен кәсіптік бағдар арасындағы көзге көрінбес байланыстың бүгіні мен ертеңіне еркін көз жүгіртуді көздейді.
Жуырда ақтоғайлық балалардың жазғы демалысымен және тұрмыстық жағдайымен танысқан Қарағанды облыстық білім басқармасының басшысы Есенғазы Иманғалиев спорт алаңдарында, көшедегі жаттығу құрылғыларында, скалодромда, стандартты емес спорттық жабдықтарда жаттығып жүрген жастардың арасында болып, балаларға адам миының іс-әрекетті қалай басқаратынын баяндап берді. Балалар да өздері құрастырған 5 жаяу туристік маршрут пен 1 велосипедтік туристік маршрут туралы ойлары мен әсерлерін ортаға салып, өздерін саяхатқа шығып қана қоймай, Қазақстанның киелі орындарының бірі Бектауатамен тереңірек танысқандарын жеткізді.
Есенғазы Нұртөлеуұлы жеткіншектерге соционика, яғни адам психикасының қоршаған ортамен ақпараттық қарым-қатынас жасау ғылымы туралы қызықты да тартымды әңгімелеп берді. Оның айтуынша, «Дихатомикалық тест» жүргізу барысында тренингтің әр қатысушысы өзінің тұлғалық типін айқындай алды. Сонымен қатар әр жасөспірімге қабілеттерін қандай салада қолдануға қатысты және мамандық таңдау бойынша ұсыныстар беруге болады.
Тренинг барысында балалар белсенділік танытып, әралуан сұрақтар қойды. Соционикалық білімге үлкен мән беріп, оны жетістікке жету үшін дұрыс пайдалану туралы көптеген жаңа ақпарат алды. Әңгіме әсеріне бөленген балалар қыркүйек айында мектепке келген кезде құрдастарымен де осындай кездесу өткізетіндіктерін айтты. Бұл үшін лагердің психологтары мен әлеуметтік педагогтерінің қызмет көрсету орталығы қосымша оқыту сабақтарын жандандыра түспек.
Мирас АСАН,
«Егемен Қазақстан»
Қарағанды облысы
