Бұзақылардың әрекеттері әлі есімнен кетер емес. Әлі өзіме-өзім келе алмай жүрмін. Мен тірі қалдым. Жанар Әбдіқадырова деген құрбым қапыда мерт болды. 16 желтоқсан күні ойымызда ештеңе жоқ мереке тамашалауға шыққанбыз. Адамдар да көңілді. Қала көшелері де көрікті еді. У-шу, апыр-топыр басталып кетті. Тас лақтыру, ұрып-соғумен қатар мылтық атылды. Әңгімелесіп қатар келе жатқан құрбым тамағын ұстап құлап түсті. Тастап кетпедім. Жағаласа жүріп қолымнан келген көмегімді көрсеттім. Арқалағандай болып, таныстар кезігіп ауруханаға әкелдік. Қолдан келгеннің бәрін жасадық. Бірақ жап-жас құрбымның өмірін сақтап қала алмадық. Ең қиыны оның шиеттей төрт баласы бар еді жетім қалды. Күйеуі ауырып басқа жақта жүрген еді. Бұдан артық қасірет болар ма? Соларды осындай күйге түсірген жастарда иман бар деуге ауыз бармайды. Бұл бір ғана оқиға. Ал ауруханамызда оқ тиіп, тас тиіп, басы жарылып, өкпесі тесіліп өлімші болып жатқан жап-жас балаларды көргенімде жаным қиналады. Керемет өміріміздің шырқын бұзған қылмыскерлер тиісті жазасын алады ғой деп ойлаймын. Әттең құрбымның орны толар ма? Жетім қалғандар қайтіп күн көреді?
Ұ.АЙМҰХАНОВА, Жаңаөзен қалалық ауруханасының медбикесі.