Өңірде кембағал жандар арасында «темір тұлпар» тізгіндегісі келетіндер қарасы көп болғанымен, арнайы жабдықталған көлік болмағандықтан жүргізушілік куәлікке қол жеткізе алмай келеді. Өзі қатарлас құрбы-құрдастарының арман-мақсатын жүзеге асыруға құлшына кіріскен Сәлімхан Сәбитов жуырда жарым жандарға арналған автомектептің жобасын Алматы қаласында сәтті қорғап келді.
«Мұндай жоба елімізде алғаш рет іске қосылғалы отыр. Тың идея жан-жақты сүзгіден өтіп, «Равная дорога» деп аталатын жоба қолданысқа енгізіледі. Біз мүгедек адамдардың өмірге толыққанды араласулары үшін барлық мүмкіндіктерді тудыруға ұмтыламыз», дейді «Қоғамдық келісім» КММ-нің жетекші сарапшысы Сәлімхан Сәбитов.
Тың бағдарлама «Металл групп» компаниясы тарапынан қолдау тауып, 2 миллион теңге бөлініпті. Бұл қаражатқа «Лада гранта» автокөлігі сатып алынып, Ресейдің Челябі қаласында мүгедек адамдарға ыңғайланып өзгертілмек. «Темір тұлпарды» жүргізудің қыр-сырын арнайы автомектепте меңгергеннен кейін өздері де емін-еркін тізгіндейтін болады.
Дәрігерлердің қорытындысы бойынша жүргізуші куәлігін алуға рұқсат етілсе, ынта-тілек білдірген ғаріп жандар қысқа мерзімді курстарға жазылуларына болады. Автомектеп ұйымдастырушылар оларды жұмысқа орналастыру, қосымша табыс табу жолдарын да ойластырып отыр.
"Алтын Қыран" серіктестігі де 4 милллион теңге мөлшерінде қаржылық қолдау көрсетуге әзір. Бұл қаржыға тағы бір «темір тұлпар» сатып алынбақ. Оқу бағасы 15 мың теңгені құрайды.
«АРДОС-Жүрек» мүгедектер бірлестігінің жетекшісі Ақжан Кәрімнің сөзіне қарағанда "Империал" таксопаркімен келісім-шарт жасалып, жұмысқа орналастыру мүмкіндігі қарастырылған. Болашақта техникалық қызмет көрсету станциясын да құрылмақ. Сөйтіп көліктерді көрші елге апармай-ақ кембағал жандар үшін жабдықтап береді.
Бүгінде облыс орталығында 8 мыңнан астамы тірек қимыл жүйесі бұзылған мүгедек адамдар тұрады.
Өмір ЕСҚАЛИ,
«Егемен Қазақстан»
Петропавл
